Seisdedos eta Cerezo sopeloztarren artelanak jarri dituzte udal erakusketa aretoan
Sopelako udal erakusketa aretoak erakusketa bikoitza hartuko du hilabete amaitu bitartean, artista sopeloztar birena alegia: batetik, "Amac" izengoitia erabiltzen duen Angel Mª Cerezo 13 argazki daude ikusgai. Guztiek paisaiak biltzen dituzte, zehazki itsasoarekin erlazionatuta daudenak. “Nire argazki-irudiek natura erakusten dute beti, eta honetarako itsasoa protagonista den batzuk aukeratu ditut, gure herriarekin harreman estua baitu”, azaldu du argazkilariak. Aretoaren beste aldean, Juan Carlos Seisdedos-en 13 margo aurkitzen dira. Izenburuaren falta ez du axola irudien indarra ikusterakoan. Okre koloreko obrak esanguratsuak eta oso pertsonalak dira, irudi familiarrak arkitektura klasikoarekin nahasten dira. Erakusketa kraft paperan tintaz egindako margoek osatzen dute, hauetan ere giza irudiak agertzen dira. “Nire margoekin, batez ere surrealistekin, nire fantasiak gauzatzen ditut”, aipatu du Seisdedosek. Argazkian, Seisdedos eta Cerezo, ezkerretik eskuinera.
Artista bien lehenengo erakusketa da. Zaletasuna badutela aipatu duten arren, obrak lantzeko nekeak hartu behar izaten dituztela onartu dute. Halabaina, “nire argazkiak ikustea eta batzuei gustatzea nahikoa da niretzat goiz jaikitzen eta hotza jasaten jarraitzeko, irudi berriak harrapatzen baititut”, Cerezok adierazi duenez. “De agua salada” izenburupean, Amac-ek margoen kontraste bortitzarekin jolasten du ingurune natural batean. “Pazientzia handiaren emaitza da. Argazki bakoitzak betetasun momentu bat islatzen du”, ziurtatu du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun