Pertsona bat atxilotu dute Algortako taberna batean lapurtzen saiatu delakoan
Ertzaintzak 32 urteko gizonezko bat atxilotu du gaurko ordu txikietan Algortan, taberna batera ezkutuan sartu eta indarra erabiliz lapurreta delitua egitera zihoalakoan. Herrizaingo Sailak jakinarazitakoaren arabera, gaur goizaldeko laurak jo baino apur bat lehenago herritar batek Ertzaintzara deitu du pertsona susmagarri bat Basagoiti etorbideko taberna batera sartu dela esanez. Hara joan den patruila-autoko ertzainek lokaleko ateburuak kalteak zituela eta beira bat hautsita zegoela ikusi dute. Barruan begiratuta, gizonezko bat ikusi dute, barraren atzean ezkutatzen. Berehala, poliziek irteteko eskatu diote, eta gizonak, kontra egin barik, horrela egin du eta eskuan zeramatzan jaka eta poltsa eman dizkie. Hartu dituen ertzainak jakak pisu handiegia zeukala igarri duenez, poltsikoetan begiratu du eta horietako batean euro bateko txanponez betetako bi poltsa aurkitu ditu, antza lapurretan lortutakoak.
Lokalaren barrualdea miatzean, poliziek barraren atzean norbaitek zabaldu duen arrastoak dituen tiradera bat ikusi dute, oraindik zentimo bateko txanponaz izan dituena. Ertzaintzaren arabera, "litekeena da lehen aipatutako txanponak bertatik ostu izana". Horregatik guztiagatik, ertzainek 32 urteko susmagarria identifikatu eta atxilotu dute, indarrez lapurreta delitua egitea leporatuta. Jarraian, polizia egoitza batera eraman dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun