Leioako Amnistiaren Aldeko Mugimenduaren oharra:
Torturarik ez!!!
Audientzia Nazionalak Erika Bilbao beste 8 gazteekin batera epaituko ditu irailaren 20 eta 21ean erakunde armatuari laguntza ematearen akusaziopean, beraietako bakoitzari 6 urteko zigorra eskatuz.
Poliziaren eskutan inkomunikaturik zirela, torturak eta tratu txarrak pairatu zituztela salatu zuten atxilotuak, beraz torturapeko aitorpenak dira, pertsona hauen kontra duten bakarra, ez besterik; honela, epaiketa hau ere epaiketa fartsa izango dela garbi geratzen da.
Horrexegatik:
1. Audientzia Nazionalari epaiketa hau bertan behera uzteko eta atxilotuak tortura eta inkomunikazioa pairatu duten prozedura judizial guztiak artxibatzeko eskatzen dugu.
2. Audientzia Nazional salbuespen epaitegia den heinean desagertzeko eskatzen dugu, izan ere torturapean lortutako aitorpenak onartuta eta euskal disidentzia zigortzeko etsaiaren justizia aplikatuta epaiketarako prozedura bermerik ez egotea ahalbidetzen baitu.
Leioako bizilagunek aldarrikapen hauek bere egin ditzaten (Gasteizko Legebiltzarrak egin berri duen legez) eta mobiliza daitezela eskatzen dugu.
Mobilizazioa Leioan:
Irailaren 21ean, ostirala, iluntzeko 8etan Boulevardean.
Leioako Amnistiaren Aldeko Mugimenduak bihar Boulevardean 20:00etan ospatzekoa den manifestazioari torturaren aurkako mezua eman berri dio, gaur eta bihar Erika Bilbao (argazkian) eta beste zortzi gazteen aurka ospatzen ari den epaiketaren harira. Izan ere, bederatzi gazteei "Zutabe" ETAren aldizkaria banatu zutelakoan erakunde armatuari laguntza ematea leporatu eta seina urte eskatzen diete, inkomunikazio egoeran sinatutako aitorpenak direla eta. Gainera, atxilotuek tratu txarrak pairatu zituztela salatu zutela gogoratu du AAMk eta epaiketa "fartsa" izango dela dio. Horren aurrean, epaiketa hori eta tortura eta inkomunikazioan oinarritzen diren guztiak artxibatzea zein Espainiako Auzitegi Nazionala, "salbuespen epaitegia den heinean", desagerraraztea eskatu du AAMk, berriki Gasteizko Legebiltzarrak egin bezala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun