Ertzaintzak I.A.B. 32 urteko gizonezkoa atxilotu zuen atzo pasa den ostiralean Algortako banketxe batean lapurreta egiten saiatu zelakoan. Herrizaingo Sailak zabaldutako informazioaren arabera, pertsona bera aurreko egunean ere atxilotu egin zuen Euskal Poliziak Algortan, taberna batean lapurtzen zegoelakoan harrapatu zutenean. Banketxeari dagokionez, ostiralean goizeko hamar eta erdiak jota, norbaitek Ertzaintzari ohartarazi zion Algortan kokatutako banketxe bateko bulegoan gizonezko bat lapurreta egiten saiatzen ari zela. Esan zutenez, minutu batzuk lehenago gazte bat banketxera joan zen eta, mehatxuzko idazki baten bidez, langile bati jakinarazi ei zion hori lapurreta bat zela eta berehala diru kopuru jakin bat emateko eskatzen ziola. Antza denez, langileak uko egin zion eskaera onartzeari eta borroka txiki bat izan zuen ustezko lapurrarekin; orduan honek alde egin zuen bere helburua lortu gabe.
Ustezko lapurrak, ekintzok gertatzen ari zirela, ez zuen armarik ezta objektu arriskutsurik erakutsi. Gertatutakoaren berri izan ondoren, eta beharrezko informazioa jaso ondoren, poliziek ikuskapen bat egin zuten inguruan eta geroxeago, hurbil dagoen kale batean susmagarriaren ezaugarri fisikoarekin bat zetorren gizon bat aurkitu zuten. Ertzainek gelditu egin zuten identifikatzeko asmotan eta bere gauzen artean banku sukurtsaleko langileak beldurtzeko erabilitako oharra aurkitu zuten. Ekintzen egilea zela egiaztatu ondoren, 32 urteko I.A.B. atxilotu eta polizia egoitzara eraman zuten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun