Irailaren 5ean eman zitzaion hasiera Barrikako VII. Tenis Irekiari eta, hamar jardunaldiren ostean, joan den asteburuan jokatu ziren finalak, gizonezkoen artekoak behintzat. Izan ere, emakumezkoen mailan ezin izan zen finala egin larunbatean, eguraldi kaskarra egin zuelako. Horregatik, partida ostiral honetan, hilak 28, jokatuko dute, 17:00etan, eguraldiak uzten badu oraingoan. Gainera, finalaurrekoei erreparatuta norgehiagoka interesgarria izango delakoan daude antolatzaileek. Azken aurreko fasean, Donostiako Maider Martinek Leire Martinezi irabazi zion, 6/2-6/1, eta Kantabriako Natalia Martinezek 6/4-6/2 emaitzarekin lortu zuen garaipena. Guztira 60 jokalarik, neska zein mutil, parte hartu dute txapelketan. Argazkian, igandean banatu zituzten mutilen sariak Juan Jose Ezpeleta alkateak eta Maria Esther Etxegarai Kultur eta Kirol zinegotziak.
Gizonezkoen maila nagusian, Josu Ortiz de Zarate Endika Sanchezi gailendu zitzaion finalean, 6/2-6/2 emaitzarekin. Dagoeneko bosgarrenez irabazi du Ortiz de Zaratek Barrikako torneoa. “Barrikako Tenis Klubak egindako senperrenak eskertu behar ditut; kirol honetan oztopo ugari itzuri behar direla kontutan hartuta”, azaldu zuen tenislariak. Kimuen artean, berriz, Borja Perezek lortu zuen garaipena David Herreriasen aurka jokatutako partidan, 6/4-6/3 emaitzarekin. Hamaika urterekin Bizkaiko eta Euskal Autonomia Erkidegoko txapelduna da Perez. Azken txanda izan ezik, torneoa “nahiko erraza” izan dela ziurtatu zuen tenislariak, garaikurra aitari eskainiz. Bestalde, Castroko David Herreriasek igandeko ekitaldia “gogorregia” izan zela onartu zuen, bost orduz jokatu behar izan baitzituen egun berean. “Ezin izan dut hobeto egin oso nekatuta bainengoen”, argitu zuen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun