Getxoko EAEk bidalitako oharra
EAE-ANVk Espainiako Armadako itsasontziek Arriluzeko kaia erabiltzea salatzen du
Egunotan Espainiako Armadak Arriluzeko kaiaz egiten duen erabilera salatu nahi du EAE-ANVk. Zehazki, 40 marinel eta kainoi bi daramatzan maila handiko Arnomendi patruilauntzia gurutzuntzien nasa erabiltzen egon da.
Herrialde aberatsetako aberatsen bisitaldi bakoitzak dakarren poliziaren mobilizazio handiari (dozenaka ertzain eta guardia zibil, patruilauntziek eta helikopteroek lagunduta), beraz, orain Espainiako Armadaren presentzia ere gehitzen zaio.
Gogoratu beharra dago kai horren kudeaketa Eusko Jaurlaritzak egiten duela, Euskadiko Kirol Portuak baltzu publikoaren bitartez. Eta Getxoko Udalak berak kaiaren beharra defendatu zuela, turismoa erakarriko lukeela esanez.
Bere garaian kai honen aurkako jarrera agertu zuen Getxoko ezker abertzaleak, besteak beste gure ingurumen fisikoa hondatzen zelako, aberats gutxi batzuen mesedetan eta Getxori onurarik ekarri gabe. Orain, etorritako turisten artean Espainiako Armada ere badagoela ikusirik, gure lehengo jarrera berretsi nahi dugu. Era berean, honakoa eskatzen diogu Eusko Jaurlaritzari: ez diezaiola baimenik eman inongo armadako itasuntziri bere ardurapeko nasak erabiltzeko, hainbeste aldarrikatzen duen bakearen izenean. Eta Getxoko Udalari, Ereagako hondartzan Espainiako Armadak egindako ariketak salatu zituen bezalaxe, oraingo erabilera hau ere jendaurrean sala dezan.
Getxoko EAE-ANV
Espainiako Armadaren Arnomendi patruila-ontziak egunotan Arriluzeko kaia erabiltzen duela salatu du Getxoko Eusko Abertzale Ekintzak. Komunikabideei bidalitako prentsa ohar batean, ezker abertzaleko alderdi historikoak gogoratu du Arriluzeko kaiaren kudeaketa Eusko jaurlaritzaren menpeko Euskadiko Kirol Portuak baltzu publikoaren eskuetan dagoela eta kai horren beharra Getxoko Udalak defendatu zuela "turismoa erakarriko lukeela esanez", bertan gurutzontziak lurra hartzeko. EAE kexu agertu da gurutzontzietan datozen "herrialde aberatsetako aberatsen bisitaldi bakoitzak dakarren poliziaren mobilizazio handiari" orain "Espainiako Armadaren presentzia ere gehitzen" delako. Horregatik, ezker abertzaleak orain arte izan duen kai horren aurkako jarrera berretsi du EAEk eta Getxoko Udalari patruila-ontziaren presentzia salatzea eta Eusko Jaurlaritzari Armadari nasa erabiltzeko eman ez diezaion eskatu die.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun