"TMEO" komiki aldizkaria Getxoko Komiki eta Manga Azokaren VI. edizioaren protagonista nagusietako bat bilakatuko da aurten. Izan ere gasteiztarrek dagoeneko 20 urte bete dute eta azaroaren 23tik 25era urteurren hori ospatu egingo dute argitalpenaren inguruko erakusketa baten bidez. Kartelak, azalak, istoriotxoak eta aldizkariaren zenbait egileren lanak egongo dira ikusgai, besteak beste. Halaber, Komiki Azokak omenaldia egingo dio aldizkari beteranoari komiki eta umore grafikoaren alorretan eginiko ibilbidea dela eta. "TMEO"ren lehenengo alea 1987. urtean kaleratu zen, 80eko hamarkadan jarduera profesionala hasitako zenbait egile biltzeko eta beren lanak erakusteko asmotan. Ordutik hona, istoriotxo garratz eta kritikoak argitaratu ditu aldizkariak, betiere filosofia independentea erakutsita eta zuzentasun politikoa alde batera utzita. Horrek guztiak paregabeko nortasuna eman dio aldizkari. Argazkian, "TMEO"ren 70. zenbakiaren azaleko irudia.
Gaur egun hainbat egileren lanak biltzen ditu TMEOk: Mauro Entrialgo, Santi Orue, Ata, Manolito Rastamán, Abarrots, Piñata, Javierre, Kini, Roger, Larry eta Galais, besteak beste. Horien irudimenetik ospetsu bilakatu diren pertsonaiak atera dira: El Maestro, Los Vallekurros, Simon, Herminio Bolaextra, Tifus, Los euskalorros, eta beste batzuk. Horietako batzuk Getxon egongo dira eta, aldizkariak bi nobedade aurkeztuko ditu azokan: Santi Orueren fotomuntaketa-albuma eta TMEO bildumaren zenbaki berria, Piñata egilearen lanak biltzen dituena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun