Polizia iturrien arabera, Joseba Elorriaga "Peski", Mikel de Gregorio "Degre", Txomin Gezuraga, Lander Labajo, Aner Mimenza eta Josu Rodriguez "Nekora" Madrilgo Canillas polizia eremuan bide daude. Horrela adierazi du Uribe Kostako Amnistiaren Aldeko Mugimenduak Etengabe bitakoraren bitartez. Hainbat komunikabideetan esandakoaren arabera, baliteke bihar bertan epailearen aurrera pasatzea. Bestalde, sei gazteak "torturatuak izateko arriskuaz" ohartarazi du errepresioaren aurkako erakundeak. Argazkian, atzo bezala gaur ere manifestazioa deitu dute 20:00etarako Algortako Telletxe plazan. Algortan mila bat eta Berangon 50 lagun inguru elkartu ziren bart, atxilotutako sei lagunen askatasuna aldarrikatzeko.
Abokatuek Baltasar Garzon epaileak berak diseinatutako protokoloa aplikatzea eskatu dute: galdeketak bideoz grabatzea, konfidantzazko mediko batek bisitatu ahal izatea eta familiarrei non dauden jakinaraztea. Baina, "oraingoz ez dute inolako erantzunik jaso, ezta poliziaren inolako komunikaziorik ere familiarrek", AAMk salatu duenez. Presoen aldeko erakundearen arabera, atxiloketa autoan, ETAri buruzko aipamen orokorrak egiteaz gain (kale borrokan jarduteak ETArekin kolaboratzea dela esate baterako), 2005eko uztailaren 21etik 2007ko uztailaren 28ra arteko kale borroka ekintzetan parte hartzea leporatzen diete, "inolako ekintza zehaztu gabe baina". "Horrek argi eta garbi adierazten du torturatzeko asmoa: Poliziak atxilotu egin ditu torturatu eta autoinkulpazioak lortzeko, inolako frogarik ez dutelako; Uribe Kostan izandako ekintzak sartu nahi izango dizkietela tortura basatiak erabiliz, beste hainbat kasuetan gertatu bezala. Conillas polizia esparruak bere historia beltza ere badauka: ekainean atxilotu batek 'bere burua beste' egin zuen eskaileretako zulotik jausiz", adierazi du errepresioaren aurkako erakundeak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun