Uribe Kostako Amnistiaren Aldeko Mugimenduak "positibotzat"
jo du atxilotuei protokoloa ezarri izana, baina argi utzi du "ez dela nahikoa. Egin behar dena inkomunikazioa kentzea da, protokoloak torturatzea apur bat zailtzen badu ere, hutsuneak uzten dituelako. Azken finean, inkomunikazioak torturatzeko bidea ematen du". Gainera, Madrilerako bidean, atzo atxilotutako seiek hainbat kolpe jaso zituztenaren zurrumurruak heldu zaizkie AAMko kideei.
Bestalde, "muntaia polizial baten aurrean egon gaitezkeela" nabarmendu dute errepresioaren aurkako mugimendukoek: "atxilotutakoei ez baitiete zehazki ezer leporatu inori. Frogak izatekotan dagoeneko mahai gainean leudeke, baina dena akusazio orokorrak baino ez dira, hainbat urteen arteko kale borroka ekintza guztiak baina bata ere dokumentatu gabe" azaldu dute. "Horrek guztiorrek torturaren bidez autoinkulpazioak lortu nahi dituztela pentsatzera eramaten du". Ildo horretan, "atxiloketa hauen atzean uholde errepresiboa" datorrela ohartarazi dute AAMko kideek.
Askatasunaren oharra:
Garzonek ondorengo neurriak hartuko dituela esan die abokatuei:
Atzo Getxon eta Berangon 6 gazte atxilotu zituen polizia nazionalak. Abokatuek Garzoni berak aurrez atera zuen Torturaren aurkako protokoloa martxan jar dezala eskatu zioten eta epaileak ondorengo neurriak hartuko dituela adierazi die gaur abokatuei:
- 8 orduro konfiantzazko medikua pasatuko da atxilotuak ikustera, entzutegi nazionaleko mediku forentsearekin batera, eta elkarrizketak gazteleraz eduki beharko dituzte.
- Atxiloketak dirauen bitartean atxilotuak bideoz grabatuak izango dira.
Defentsak ipini du konfiantzazko medikua.
Askatasuna
Zazpi atxilotuen askatasuna eskatu dute Algortan 800 bat lagunek
2007ko urr. 19a, 00:34
Ehunaka eta ehunaka pertsona manifestatu dira gaur iluntzean Algortako kaleetatik atzo atxilotutako sei lagunen eta gaur atxilo hartu duten Zigor Goikoetxea "Gorrion"en askatasuna aldarrikatzeko. 800 bat pertsona batu dituen martxa hasi baino lehen, Amnistiaren Aldeko Mugimenduaren kideek jakinarazi dute Baltasar Garzon epaileak lehenengo sei atxilotuei torturen aurkako protokoloa ezartzeko konpromisoa hartu duela, abokatuek egindako eskaeren aurrean. Gainera, hainbat informazio iturriek zabaldu dute seiak Garzonen aurrean pasatuko direla bihar eguerdian. Bitartean, atxilotuek zortzi orduro konfiantzazko medikuaren bisita izango dute, Auzitegi Nazionaleko forentsearekin batera. Era berean, atxiloketak irauten duen bitartean bideoz grabatuko dituzte sei gazteak. Bestalde, protokoloan senideei atxilotuak non dauden jakinaraztea ere jasotzen da, baina hainbat senidek deirik ez dutela jaso esan dute. Garzonek atxilotuak medikuekin gazteleraz berba egitera derrigortu ditu. AAMk manifestazioa deitu du biharko eta egunero Algortako Telletxe plazan, 20:00etan, zazpi atxilotuei inkomunikazioa altxatu arte.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun