Astintzen musika taldea ia jaio berria, Berangoko jaietan Skalariak taldearekin egindako kontzertuan batailatu baitzen, baina Gorka algortarrak (gitarra eta ahotsa), Iskander urduliztarrak (bateria) eta Iñigo (gitarra) eta Unai (baxua) berangoztarrek osatutako laukotea ezin ezagunagoa da eskualdean. Haietako batzuek Kuenta Atras taldearekin egindako kolaborazioez gain, urteotan Libertad Kondizional taldea osatzeagatik dira guztien ezagun.
"Libertad Kondizional ginenean punk musika egiten genuen, ikutu melodikoren batekin. Baina une jakin batean konturatu ginen taldearen kanta zaharrak jada ez genituela jotzen, ez genituela entseguetan abesten, berriak baino ez, abesti zaharrek ez gintuztelako betetzen" aitortu du Gorkak. Hor hasi zen taldea berriztatzeko hausnarketa, Libertad Kondizionalaren soinua aldatzean. "Esaten ziguten 'pok' edo, gauza bera dena, 'pop-punk' egiten genuela" gogoratu du Astintzeneko abeslariak, "baina gustorago egiten dugu gaur punk moderno moduko bat, postpunk edo".
Euskal Herria musika eta hizkuntzaren bidez eraikitzen
Hausnarketari osagai gehiago joan zitzaizkion sartzen eta Euskal Herritarrak eta euskaldunak izanda, zelan ez, hizkuntz gatazkari heldu zion taldeak: "Libertad Kondizionalek pare bat kanta baino ez zituen euskaraz. Eta taldearen proiektua aldatzean pentsatzen genuen bazela garaia euskarari garrantzi gehiago emateko. Horregatik izen euskalduna jartzea erabaki genuen eta, haratago, handik aurrera dena euskaraz egitea, kanta guztiak".
Erabaki hori hartu zutenetik, "sufrimendua baino ez da izan" dio irribarretsu Gorkak: "bederatzi hilabeteko haurdunaldi gogor modukoa izan zen, barne lanez, entseguez...". Emaitza, baina, "oso positibotzat" jo du eta horrela frogatu zuten Berangoko jaietan emandako kontzertuan. Ondoren, beste bi saio egin dituzte taula gainean. Guztira, errepertorioan hamaika abesti propio dituzte, tartean berriki egindako "Uribe Kosta martxan", eta bi bertsio, guztiak euskaraz.
Biharko Uribe Kostako gazte martxaren bidez "hortzak erakustera" deitu du Astintzen taldeak
Bihar eskualdeko gazte mugimenduak burutuko duen Uribe Kostako martxa antikapitalistan "Erandion goizeko 10etatik" parte hartzera deitu du gaur Astintzen musika taldeak. Ekimen horretarako "Uribe Kosta martxan (mp3)" abestia egin duten musikariek eskualdeak bizi duen sarekada giroa dela eta "gazteok zapaltzen gaituen sistemaren aurrean hortzak erakutsi behar dugula" iritzi diote. Gorka Rodriguez Astintzeneko gitarra eta abeslariak UKBERRI.NETekin gaur arratsaldean izandako solasaldian aitortu du ez zutela "ezta pentsatu ere" martxaren arduradunek abestia egitea eskatu zietenean: "gu ere gazteak gara eta beste guztien arazoak ditugu". Horregatik, "zalantzarik gabeko baietza" eman zioten abestiari zein etxebizitza, hezkuntza eta proiektu txikitzaileen inguruan independentziaren alde eta kapitalismoaren aurka egingo duen martxari. Gainera, Okupando Rom@ eta Arritmia taldeekin batera, Astintzenekoek 2007ko gazte martxari bukaera eta gauari hasiera emango diote Berangoko frontoian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun