Imanol Landa alkateak, Margarita Uriak Espainiako Kongresuan Getxoren alde egindako lana eskertu eta gero, Getxorako antzoki berria egiteak duen garrantzia azpimarratu nahi izan du: "eraikin enblematikoa izango da udalerrirako” esan du Landak, “funtzio-anitzeko gunea, aurreratua eta modernoa, 22 milioi eurotako aurrekontua duena”. Aisialdirako eta kulturarako eskaintza sustatzeaz gain, Algortaren eta udalerri osoaren bizitza sozialerako eta ekonomikorako pizgarria izango da.
Hartara, joan den uztailean herritarren partaidetza bultzatzeko prozesua hasi zen Getxo Antzokiaren inguruan bizi diren auzokideekin, hauek izango baitira lanekin eragozpen gehien jasoko dituztenak. Hile honetan bertan hainbat udal elkarteekin jarraitu du prozesu horrek eta, joan den astean, joan nahi izan zuenarentzat hitzaldi irekia egin zen, lanak aurrera eramateko HAPOren aldaketa zehatza ezinbestekoa dela eta. Bien bitartean, Juan Maria Uriarte arkitektoa aurreproiektuan ari da lanean, aurkeztutako alegazioak bideragarriak diren ala ez ikusteko.
Landak adierazi duenez,”epeak betez gero, egungo antzokia eraisteko lanak 2008ko urtarrilean egin litezke eta Getxo Antzoki berriaren inaugurazioa 2011ko lehen hilabeteetan”.
Espainiar Estatuko aurrekontu orokorrek bi milioi euroko diru-laguntza aurreikusten dute, 2008an, Getxo Antzoki berriaren eraikitze lanetarako, Madrilen EAJk eta PSOEk adostutako akordioaren ondorioz, gaur Margarita Uria EAJren diputatu eta legelari getxoztarrak eta Imanol Landa Getxoko alkateak (argazkian) adierazi dutenez. Epe guztiak betetzen badira, egungo Getxo Antzokia bertan behera botatzeko lanak datorren urtarrilean has litezkeela aurreratu du Landak. Bi milioi euroko partida berri hau, “kulturarako %1arena deritzona”, PSOErekin aurreko urteetan Madrilen adostutako hiru milioiei gehitu beharko zaie, EAJk beti hala eskatuta. Uria baikor agertu da eta datozen urteetan Getxo Antzoki berria eraikitzeko Madrilen laguntza lortzen jarraitzen espero duela esan du, baina hori datorren martxoan egingo diren hauteskunde orokorretan nork irabazten duenaren arabera izango dela esan du. Hasieran, 2008rako aurrekontu orokorretan 1,5 milioi euro aurreikusten zen 22 milioiko aurrekontua duen Getxo Antzokirako.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun