Askatasunak deitoratu du Espainiako Gobernuak Figueroari eta beste hamaika euskal gatiburi preso gaixo larri eta sendaezinak kaleratzea aurreikusten duen Kode Penalaren 92. artikulua ukatu izana eta Espainiako Estatuak preso gaixoak "txantaia eta presio politikoa egiteko" erabiltzen dituela salatu du. Horren ondorioz, Figueroa eta beste preso gaixo larri eta sendaezinen askatasuna aldarrikatu dute. Era berean, Etxeratek Donostiako PSE-EEren egoitzaren aurrean salatu du gaur preso gaixoen egoera, tartean Figueroarena. Txostena (pdf) ere kaleratu dute.
Askatasunaren oharra:
Preso gaixoak oso egoera larrian: Anjel Figueroa
Anjel Figueroa (Algorta) 1994tik hona dago espetxean. Epilepsia tenporala eta eskuinaldeko esklerosi mesiala dauka. Gaixotasun larria eta sendaezin honen ondorioz krisialdi epileptiko larriak izaten ditu, konortea galtzen duelarik, eta tartean absentziak, memoria galerak eta aluzinazioak ere izaten ditu.
Espetxean gaixotasunak okerrera egin eta 2006ko maiatzean garunetako operazio korapilatsu eta arriskutsua egin zioten Gurutzetako ospitalean. Ebakuntza horrek ez zuen nahi ziren emaitzak izan eta gaur egun krisialdi etengabeak izaten ditu, azken hilabeteetan areagotu egin direnak.
Bere tratamendua daramaten medikuen arabera, gaixotasunari aurre egin ahal izateko, medikazioa zorrozki hartzeaz gain, ordutegi aldaketak, loaren gabezia eta krisialdiak eragin ditzaketen estres egoerak ekiditea ezinbestekoa da. Bizibaldintza hauek, ordea, ez datoz bat kartzela erregimenarekin.
Kode Penalaren 92. artikuluak preso gaixo larri eta sendaezinak kaleratzea aurreikusten du. Gaur egun, Figueroaz gain, beste hamaika euskal preso politiko dituzte gaixotasun larri eta sendaezinak. Hala ere, Espainiako estatuak txantaia eta presio politikoa egiteko erabiltzen ditu preso gaixoak Euskal Herria menperatzeko daraman errepresio estrategiaren barruan.
Gaur arte bost euskal preso politiko hil dira kartzelan hainbat gaixotasunen ondorioz eta beste zazpi hil dira kaleratu ondoren, gaixorik zirelako.
Preso gaixo larri eta sendaezinak kalera!
Anjel askatu!
Askatasuna
Anjel Figueroa Gurutzetako ospitalera eraman dute
2007ko urr. 22a, 23:33
Anjel Figueroa (argazkian) gaur goizean ingresatu dute Gurutzetako ospitalean, bere egoeraren jarraipenerako egin behar dizkioten proba medikoak egiteko, Uribe Kostako Amnistiaren Aldeko Mugimenduak Etengabe bitakoraren bidez jakinarazi duenez. Bestalde, Askatasunak gogoratu duenez, Figueroa 1994tik geroztik dago espetxean eta epilepsia tenporala eta eskuinaldeko esklerosi mesiala gaixotasunak pairatzen ditu, azken hori larria eta sendaezina dena. Presondegi ezberdinetan, konorte galerak, absentziak, memoria galerak eta aluzinazioak izan ditu eta bere osasunak okerrera egin du. Gauzak horrela, 2006ko maiatzean garunetako operazio "korapilatsu eta arriskutsua" egin zioten Gurutzetako ospitalean, espero ziren emaitzak lortu gabe. Egun, Figueroak krisialdi etengabeak ditu, geroz eta maizagoak. Bere medikuen arabera, Figueroak ordutegi aldaketak, loaren gabezia eta estres egoerak ekidin behar ditu derrigorrez, baina "bizibaldintza hauek, ordea, ez datoz bat kartzela erregimenarekin".Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun