Carlos Sola Sarabia Osakidetzako Uribe eskualdeko zuzendariaren iritzia bestelakoa da, baina. Osasun arduradunak Barrikako Udalari bidalitako bandoaren arabera, "mediku berriari esleitu dioten pertsonak jakin ostean, udalerriak bi ordutegi ezberdinak izango ditu. Gainera, biztanleek egunero kontsulta izango dute Plentzian eta astean hiru egunetan Barrikan". Dena den, dagoeneko galdera Legebiltzarreko Mahaiak onartuta dago, osoko bilkuran ahoz erantzuteko. Besteak beste, honako hau jakin nahi du Talde Sozialistak: "Zer ekintza burutuko ditu Osasun sailak Barrikako biztanleen % 100i udalerrian bertan osasun-zerbitzua emateko", batetik, eta "Osasun sailak Uribe Kosta eskualdean eta, zehazki, Barrikako udalerrian etorkizunean izango diren osasun-beharrei buruzko azterlanik egiten ari den, kontuan hartuta bertako biztanleria etengabe hazten ari dela?".
1.400 paziente inguru
Plentziako osasun zentro berriak uztailaren 30ean zabaldu zituen ateak bertoko 4.000 bat bizilagunei eta Barrikako beste 1.400 ingururi arreta emateko. Barrikoztarrek egunero Plentziara hurbildu beharrik ez zuten: astean bi egunez kontsulta ematen zitzaien Udalak Osakidetzako sendagile batek eta erizain batek pazienteei arreta emateko jarritako kontsultategi txikian. Orain, ordea, "mediku bakarra da gerturatzen dena eta bizilagun gutxiri ematen die arreta", Mendiak salatu duenez.
Urriaren 1ean mediku berri batek bere jarduera hasi zuen Plentziako osasun zentroan, arratsaldeko ordutegian (13:00tik 20:00etara), dagoeneko lanean diharduten beste bi osagileekin batera, plentziarrak eta barrikoztarrak artatzeko. PSE-EEk, ordea, sendagilea "Barrikan bertan eta bizilagun guztientzat" izatea eskatu du eta horri buruz galdetuko dio, Eusko Legebiltzarreko osoko bilkuran, Gabriel Inclan Osasun sailburuari. Idoia Mendia sozialisten bozeramaile barrikoztarra eta Euskal Sozialistak taldeko legebiltzarkideak adierazitakoaren arabera, urriaren 1etik "Barrikako biztanleen % 90i" jakinarazi zaie beraien OTI txartelak Plentziako osasun zentroko sendagile bati transferitu dizkiotela. "Mediku horrek adierazi du ez dela joango kontsulta ematera Barrikako Udalak Osakidetzako sendagile batek eta erizain batek Barrikako pazienteei arreta emateko ezarrita daukan kontsultategi txikira", ohartarazi duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun