Argentinako Opus Cuatro ahots laukoteak errezitaldia eskainiko du igande honetan, urriak 28, 19:30ean Areetako Andres Isasi Udal Musika Eskolan. Horiekin batera, Ereaga Fundazioko musika akademiako kantaek ere abestuko dute. "Kultur ezberdinak musikaren bitartez senidetzea da kontzertuaren helburua", Getxoko udal iturriek adierazi dutenez. Horrela, besteak beste, Hego Amerikako folklorearen lan batzuk abestuko dituzte, esate baterako, “La flor de la canela”, “Vasija de barro”, “Adios nonino” edo “Caballo viejo” izenekoak. Kontzerturako sarrera doakoa izango da. Hala ere, gonbidapena eraman beharko da, eta horiek musika eskolan edo Ereaga higiezinen agentzian (Zugatzarte etorbidea, 8) hartu ahal izango dira.
Opus Cuatro ibilibide luzeko taldea da eta ospe handia du mundu mailan. 1968an sortu zen musika herrikoia, folklorea, Hego Amerikako lanak, tangoak eta espiritualak abesteko. Taldea Alberto Hassan eta Marcelo Balsells tenoreek, Hernando Irahola baritonoak eta Federico Galiana baxuak osatzen dute. Areetako kontzertuak amaiera ipiniko dio taldea Europatik, tartean Suitzatik, Eslobeniatik, Holandatik (CD bat grabatu dute) eta Salamankatik egiten ari den birari. Ereaga Fundazioa, berriz, etekin asmorik gabeko taldea da, udalerrian du egoitza eta izaera sozialeko egitasmorekin elkarlanean aritzeko sortu zen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun