Bi urtez luzatu dute bizikleten doako mailegua Getxon
2007ko urr. 25a, 18:40
Energiaren Euskal Erakundeak (EEE) eta Getxoko Udalak hitzarmena sinatu berri dute, udalerri barruan joan-etorriak egiteko, bizikletaren erabilera sustatzeko asmoz. Hartara, tokiko erakundeak beharrezko baliabideak jarriko ditu sentsibilizazio ekimenak abian jartzeko. Bestetik, EEEk 140.000 euro emango ditu horiek aurrera eramateko. Ekintzen artean, ekainaren 15etik irailaren 15era bitartean zabalik egon den bizikleten doako mailegu zerbitzua hurrengo bi urtetan ere eskaintzeko erabakiaren berri eman du, gaurko prentsaurrekoan, Keltse Eiguren Ingurumen zinegotziak. “Udalak bizikletaren erabileraren aldeko apostua egin nahi du abantaia ugari dituelako, tartean ohitura osasuntsuagoak bultzatzen dituelako, ez duelako zaratarik sortzen, toki gutxi hartzen duelako eta merkea delako”, azaldu du tokiko arduradunak. Datozen bi urteei begira, bizikleten kopurua 50ra handitzea aztertzen ari dira, baita horiek hartu eta uzteko hirugarren toki bat jartzea ere. Argazkian, Imanol Landa alkatea eta Keltse Eiguren alkateordea mailegatutako bizikleten gainean / Getxo.net.Getxoko Udalak udan eskainitako zerbitzua 2.487 lagunek erabili zuten. Horietariko batzuek gainera behin baino gehiagotan mailegatu zuten bizikleta eta, horregatik, zerbitzua, guztira, 5.000 aldiz baino gehiago erabili egin zuten herritarrek, Eigurenek emandako datuen arabera. Adinari erreparatuz, 65 urtetik gorako pertsonak erabiltzaileen %27 izan ziren, 18 eta 25 urteen artekoak baino gehiago, azken horiek %8,11 izan baitziren. Beren jatorriari dagokionez, %41,96 ziren getxoztarrak. Proportzioan, irailean izan ziren mailegurik gehien. Ingurumen zinegotziak erabiltzaileek egindako iradokizunak (46 guztira) ere izan ditu hizpide, "horiei esker zenbait hobekuntza egin baitziren, tartean, 14 urtetik beherakoei zerbitzua erabiltzeko aukera ematea, txirrinak ipintzea, bizikleta kopurua 36ra handitzea eta ume txikienentzako 4 aulki ipintzea, besteak beste".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun