Minutu erdiz baloiari buruarekin 163 ukitu baino gehiago ematen saiatuko da bihar Erandion Erick Hernandez kubatarra
Ostiral honetarako, urriak 26, kirol ikuskizun bitxia antolatu dute Erandion. Eguraldiak uzten badu –bestela, azoka zaharrean egingo dute–, Guinness errekor berria erdiesten ahaleginduko da, 17:30ean, Irailaren 23a plazan (udaletxe aurrekoa), Erick Hernandez. Kubatarrak 30 segundo baino ez ditu izango buruarekin baloiari 163 kolpe baino gehiago emateko. Bertan izango ditu lagun, gainera, Andoni Iraola, Aritz Aduriz eta Carlos Gurpegi Athletic-eko jokalariak, udal iturriek adierazi dutenez. Ekimena Euskadi-Cuba elkarteak eta Deporte y Desarrollo gobernuz kanpoko erakundeak deitu dute, “Cuba va, Kuba bai” kanpainaren harira. Hain zuzen, "euskal jendarteari Kubako garapen sozial ereduaren berri ematea" du helburu kanpainak, horretarako hainbat arlo jorratuz: kirola, hezkuntza, osasuna, kultura, garapen jasangarria, nazioarteko elkartasuna edo parekidetasuna, besteak beste. Abuztuan Perun izandako lurrikarak kaltetutakoei ere lagundu nahi diete biharko ekitaldiarekin. Hernandez kubatarraren saioa baino lehen "Guti" ezagunak egingo du erakustaldia. Argazkian, Erick Hernandez Fidel Castrorekin batera / Euskadi-Kuba.
Erick Hernandez kubatarra hainbat erakustaldi egiten ibili da azken asteotan txokorik txoko. Izan ere, biharko dema irabazi ala ez abuztuan gainditutako Guinness errekorraren –buruarekin 350 ukitu minutu batean– jabe bada kirolaria. Gainera, joan den ostiralean, Barakaldoko Forum-Megaparken egindako saioan, eserita eta bi zangoak erabiliz, baloi ukituen munduko errekorra haustea lortu zuen; bi ordu, 43 minuto, 48 segundoko denbora marka ezarriz. Horretaz gain, hezkuntza institutu batzuetan, kirol kubatarrari buruzko hainbat hitzaldi ematen ibili da, Juan Antonio Lotina futbolari ohi eta Kubako Nazio Futbol Eskolako zuzendariarekin batera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun