Urriaren 31 dute izena emateko azken eguna berbalagun aritu nahi diren getxoztarrek
Berbalagun ekimenak 100 lagundik gora batu zituen joan den ikasturtean, euskaraz eta aisiaz gozatzeko. Aurtengoan, berriz, gehiago izan nahi dutela adierazi dute Egizu Getxo euskaldun! elkartekoek. "Horretarako zure inguruko norbait gonbidatzea proposatzen dizugu. Euskara ikaslea zein euskaraz ondo dakiena, denok gara ezinbestekoak Berbalaguna egitasmoan", zehaztu dutenez. Izan ere, "euskaldunon arteko sarea handitu eta sendotzea" da helburua, tabernan, paseoan, frontoian, mendi ibilaldietan, irteera kulturaletan, berbalagunen topaketetan... euskararen erabilera bultzatuz. Gauzak horrela, ikasturte honetako lehenengo zitak data badauka: larunbat honetan, urriak 27, Itxina aldera egingo dute txangoa. Argazkia: Egizu.
Horrenbestez, urriaren 31ra arte dago epea Berbalagun egitasmoan izena emateko, bulegoan zein telefonoz. Edozein zalantza edo ekarpen egin nahi izanez gero, deitu (619 935 541), idatzi (egizugetxo@yahoo.com) edo bulegotik pasa (Karitatea 1, sotoa / Algorta).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun