Getxo eta Berangoko atxiloketek "oinarri juridikorik ez" dute Askatasunaren ustez
2007ko urr. 26a, 21:55
Gaur goizean prentsaurrekoa egin da Bilbon, joan zen astean Uribe Kosta eskualdean egindako atxiloketa eta espetxeratzeei buruz eta horren gaineko informazioa zabaldu dute Gara.net eta Berria.info agerkariek. Besteak beste, atxilotu zituzten lagunei buruzko autoak (pdf) "oinarri juridikorik ez" duela adierazi du errepresioaren aurkako erakundeak. Baltasar Garzon Espainiako Auzitegi Nazionaleko epailearen erabakiz, Lander Labajo, Josu Rodriguez "Nekora", Txomin Geruzaga, Joseba Elorriaga "Peski", Mikel de Gregorio "Degre" eta Aner Mimenza Soto del Realen (Madril) espetxeratu eta Zigor Goiketxea aske gelditu zen fidantzapean, 6.000 euro ordainduta. Besteak beste, Mimenza eta Labajoren atxiloketen inguruan autoan "baieztapen lotsagarriak” egiten zirela kritikatu du Arantza Zulueta abokatuak: Garzonen arabera bi gazte horiek "kale borroka egiteko argibideak ematen zituzten eta ETAko kide ziren. Baina non daude argibide horiek? Edo zergatik ez dituzte atxilotu lehenago?”, gaineratu du. Espainiako Poliziak nahi zuena entzun ahal izateko atxilotuek “tratu txarrak, presio psikologikoak eta mehatxuak” jaso zituztela ere salatu du Zuluetak, baina epaileak “ez zion kasurik egin" salaketa horri. Argazkian, atxilotuen senide eta lagunak atzean, Julen Larrinaga Askatasuneko bozeramailearekin batera eman du prentsaurrekoa Zuluetak / Etengabe.Bestalde, auto horren irakurketa juridiko-politikoa plazaratu du Uribe Kostako Amnistiaren Aldeko Mugimenduak, Etengabe bitakoraren bitartez. Zalantzan jartzeaz gain, akats larriak antzeman ditu Garzonen idatzian errepresioaren aurkako erakundeak. Are gehiago, "auto-tranpatzat" jo du. AAMren ustez, "neurririk gabekoa" da egozten dieten gertaeren eta horien frogatzeko ematen diren azalpenen "eskasia". "Ez gara esaten ari gertaerak larriak ez direnik, baina horien zehaztasun falta, doitasun gabezia finean, gertatu direla ere zalantzan jarri dezake", adierazi dute. Adibide ugari jarri dituzte: autoan irakur daitezkeen "1) En el año 2004, en fecha no determinada (…)", "3) En el año 2006, en fecha aún no concretada (…)", "7) En mayo de dos mil siete (…)" eta "10) En el año 2007 en el transcurso de una manifestación (…)"; ETAren pegatinak edukitzea eta zaramontziak erretzearen arteko "harreman zalantzagarria"; Mimenzari “ETA matalos” zioen pankarta jartzea leporatzea "inolako frogarik eman gabe"... eta beste hamaika.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun