Orotara, herriko 36 leku publikoetan jarriko dituzte argi eta apaingarriak. Besteak beste, 99 argi-uztaik apainduko dituzte herriko denda eta saltoki gehien dauden 13 kale: Kale Nagusia, Mesedeetako Ama, Andres Larrazabal, Klub eta Paulino Mendibil, Areetan; Algortako Etorbidea, Amezti, Basagoiti Etorbidea, Juan Bautista Zabala, Torrene eta Telletxe, Algortan; eta aurten berritasun bezala Itzubaltzeta / Romoko Ibaiondo eta Kresaltxu kaleak ere argiztatuko dituzte. Gauez zein egunez argia ematen duten argi-uztaiak dira, material bereziarekin egindakoak eta "saltzaileen eta erosleen oso gustukoak direnak", udal iturrien arabera. Horretaz gain, denda guneetatik aldenduta dauden beste 23 lekutan ere argiak eta apaingarriak ipiniko dituzte, hala nola, udalerrira sartzeko biderik nagusietan –Euskal Herria, Eduardo Coste, Areetako Etorbidea, Artatza eta Ormazako biribilguneak, Asuako errepidea–, plazetan –Santa Ana, Bizkaia Zubia, Ganeta...–, parkeetan eta Maidagan eta Arriluze-Zugatzarte bezalako esparrutan.
Banderatxo apaingarriak
Bestalde, GEEMk ekimena abiatu du nahi duten enpresa eta saltokiek, elkartearen bazkide zein bazkide ez direnek, Gabonetan udalerria apaintzeko egotasmoan parte har dezaten. Merkatari elkarteak hala eskatzen duten saltzaileei kolore hori eta laranjadun banderatxoak salduko zaizkie. Euskarri tolesgarria dute eta zoriontzeko esaldiak dituzte euskaraz eta gaztelaniaz. Banderatxoak 2,30 metroko garaiera dute eta saltokien atarietan ipintzekoak dira. Bere salneurria 100 euro ingurukoa da.
Abenduaren 4tik urtarrilaren 7ra arte egongo dira piztuta aurten gabon argiak Getxo udalerrian, Imanol Landa alkateak aurreratu duenez. Gainera, aurten, aurreko agintari Iñaki Zarraoarekin gertatu ez bezala, Udalak jarriko du horiengatik jarri beharreko diru guztia, Getxo Enpresa eta Merkataritza (GEEM) elkartearekin adostutako hitzarmenari esker. GEEM bera arduratuko da merkatalguneetako argiez. Guztira, merkatalguneei emango zaien laguntza eta herriko gainontzeko lekuetan ipiniko diren apaingarriak kontuan hartuta, 120.000 euro emango ditu tokiko erakundeak: "Udalak ahalegin handia egin du, hortaz", Landaren hitzetan, "Getxon Eguberritan merkatal jarduerari bultzada emateko". “Merkatal jarduera hobeto garatzeko testuinguru egoki bat osatzearen eta Gabonetan guztion aldetik kontsumo zentzuzko eta arduratsuagoa izateko mezua zabaltzearen arteko oreka bilatzen saiatu gara”, azaldu du. Maite Ibarbengoetxea GEEMeko presidenteak, bere aldetik, elkartearen eta udal agintarien artean izandako "lankidetza giro aparta" nabarmendu du, enpresei laguntza berria ematea ahalbidetu duela “udalerriko bizitzaren alderdi garrantzitsu bat direlako”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun