Uribe Kostako udaltzainak ere metroa zaintzen arituko dira
2007ko urr. 30a, 23:01
Metro Bilbaok eta trenbideak zeharkatzen dituen hamaika udalerriek lankidetza hitzarmena sinatu dute gaur, "garraiobide horretan edozer ezbehar, gorabehera edo istilurik denean zelan jardun arautzeko". Akordio hau udalerri bakoitzeko udaltzaingoaren eskumen eta berezitasunetara egokitu da, eta "metroko instalazioetako segurtasunari beste bultzada bat" emango dio, metroko iturrien arabera. Hain zuzen, ekainean Ertzaintzarekin lortutako hitzarmenarekin lotu dute. Gauzak horrela, Barakaldo, Berango, Bilbao, Erandio, Etxebarri, Getxo, Leioa, Plentzia, Portugalete, Sestao eta Sopelako udaltzainek, "ahal duten neurrian, eta behar denean", metroaren sarbideetan eta inguruetan, zein geltoki barruan gerta litezkeen istiluetan esku hartzeko aukera izango dute. Argazkian, Getxo udalerriko udaltzain bat Algortan."Funtsean, udalerri hauetako udaltzaingoek, beren eskumeneko geltokien inguruko segurtasun zereginetan lagunduko dute, eta geltokietara sartzea ere izango dute, egoki irizten diotenean. Era berean, sostengua emango diete Metro Bilbaoko langileei eta zaintza zerbitzukoei, polizi jarduerarekin lotuta dauden administrazio prozeduretan", azaldu dute gaurko prentsaurrekoan garraio konpainiako arduradunek. Zehaztu dutenez, "prebentzioari" jarriko dio arreta berezia akordioak. "Udaltzaingoek dituzten baliabide eta eskumenen arabera planifikatuko dituzte beren prebentzio jardunak, eta Metro Bilbaok, informazio trukeetan eta pertsona edota ondasunetarako kaltegarriak izan litezkeen unean uneko gertakarien aurreikuspenetan (herrietako jaiak, kontzertuak, manifestazioak, elkarretaratzeak, eta abar) oinarrituz, egiten diren istilu eta arazoen arriskuen mapak kontuan hartuta indartuko ditu bere zerbitzuak", adierazi dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun