Sei urte beteko dira bihar, asteazkena, ETAk Jose Maria Lidon Bizkaiko Auzitegiko Bigarren Aretoko magistratua Algortako bere etxeko garajean hil zuenetik. Hori dela eta, Jose Maria Lidonen aldeko kontzentrazioa antolatu du biharko Deustuko Unibertsitateko Bakearen Aldeko Koordinakundeak. Omenaldia, goizeko hamaiketan hasiko da, Deustuko Unibertsitateko Eskola Komertzialaren aurrean eta hamar minutuko iraupena izango du. Lidonen hilketan lagundu zutelakoan, Orkatz Gallastegi berangoztarra zigortu zuten nahiz eta Amnistiaren Aldeko Mugimenduak hainbatetan salatu frogak eta epaiketak "muntaia" zirela, Estatuak "norbait" zigortu bide zuelako: "Orkatz hasieratik zegoen kondenatuta. Horretarako atxilotu zuten. Lidon ustez hil zutenak hilak ziren, eta errudun zuzenen bat behar zuten, bide batez, Lidonen familiarrek kasu hauetan errudunei aplikatzen zaien 'erantzukizun zibila' jasotzeko. Eta Orkatz kandidato ona zen Ertzaintzarentzat, Eusko Jaurlariarentzat. Eta hor dago, espetxean, Ertzaintzak, Eusko Jaurlaritzak, Espainiako auzitegiek, Espainiako Gobernuak, dirua legezko itxurak eginez kobratu beharrak, 'El Correo'k eta bestek kondenatuta". Urtzi Murueta leioaztarra ere auziperatuta dago kasu horregatik.
Bakearen Aldeko Koordinakundearen arabera, bihar sei urte beteko dira "hiltzaile batzuek guztiz onartezina den Jose Maria Lidonen aurkako epaia idatzi zutenetik". Erakundeak prentsa ohar baten bidez zabaldu duenez, "inoiz eta inolaz ez dugu onartu inoren hilketa zein erailketa gure izenean edota gure lurraldearen izenean. Eta inoiz ez dugu Jose Maria Lidon ahaztuko, bere memoria iraunkorra bera isildu nahi zutenentzako gure lehenengo erantzuna baita. Gainera, ahazteak akats berdintsuak egitera eraman baitezake eta Jose Mariren senide, adiskide eta lagunok akorduan dugulako".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun