Katalanek ere parte hartuko dute Getxo eta Sopelako Itsas Joko Atlantikoetan
2007ko aza. 7a, 18:32
Ostiral honetan, azaroak 9, Bartzelonako Itsas Azoka bisitatuko dute Euskal Kirol Federazioen Batasuneko (EKFB) ordezkariek, Kataluniako Bela Federazioak egindako gonbidapenari erantzunez, prentsa ohar bidez jakinarazi dutenez. Rafael Munilla 2008ko Itsas Joko Atlantikoen Batzorde Exekutiboko presidente eta EKFBeko kidea eta Ruben Bueno erakunde bereko kudeatzailea izango dira datorren urtean Getxo eta Sopela udalerrietan egingo diren itsas jokoak sustatzeko arduradunak. Halaber, aipatu itsas azokak antolatu eta Espai de Mar-en burutuko den ekitaldi instituzional baten bitartez, EKFBk 2008ko Itsas Joko Atlantikoetan parte hartzera gonbidatuko ditu ofizialki Kataluniako bela, arraun, kanoe, urpekaritza eta surf federazioak. Horretarako, banderen elkar trukaketa egingo dute. Besteak beste, Ignasi Doñate Kirol Kontseiluko zuzendari orokorrak eta Anna Pruna idazkari orokorrak hartuko dute parte ekitaldian. Azgazkian, François Arbellot Itsas Joko Atlantikoen Nazioarteko Batzordeko idazkari nagusia, Andoni Ortuzar EITBko zuzendaria eta Imanol Garai Sopelako alkatea, lehenengoak urriaren 1ean eta 2an Euskal Herrira egindako bisitan. Batzorde Exekutiboa pozik agertu da Kataluniak jokoetan parte hartzea onartu duelako, bertako selekzioak maila oso ona ekarriko du-eta txapelketara. Bestalde, federazio kataluniarrek ere baikor agertu dira; izan ere, uztaileko hitzordua euren selekzioek nazioartean lehiatzeko aukera paregabea dela uste dute. Bestalde, ostiraleko ekitaldian, Bretainiako jokoetan euskal selekzioak izandako parte-hartzearen inguruko dokumentala ikusi ahal izango dute bertaratutakoek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun