Trikitilari estatubatuarrak, italiarrak, katalanak, belgiarrak eta euskaldunak joko dute etzi Algortan
Ostiral honetan, azaroak 9, VI. Nazioarteko Trikitixa Jaialdia egingo da Algortako Getxo Antzokian, Bizkaiko Trikitilarien Elkarteak antolatuta, Getxoko Udalaren Euskara zerbitzuaren eta Bizkaiko Aldundiaren laguntzarekin. Jaialdia arratsaldeko 20:00etan hasiko da. Bertan Mexiko Berritik (AEB) etorritako Ken Kepler eta Jeanie McLearie, Simone Botasso italiarra (argazkian), “21 Boutons” talde belgiarra Pere Romani katalanarekin batera eta, azkenik, sei euskal musikari arituko dira: lehenendabizi, Agus Barandiaranek eta Mikel Romerok osatutako bikotea (hauek “Korrontzi” taldekoak) eta, ondoren, Eneko Odiagak, Galder Elortzak, Victor Muñozek e Irkus Ansotegik osatutako laukotea, azkeneko bi horiek getxoztarrak. Kontzertua amaitutakoan, 22:00etatik aurrera, musikariek eta nahi duenak Algortako Piper´s Irish Pubean egingo den triki-sessionean parte ahal izango dute. Sarrera 6 eurotan jarri dute eta Algortako Kultur Etxean, Villamonten, erosi ahal izango dira.
Aurten jaialdiaren helburu nagusia “munduan dauden hainbat trikitixa edota soinu ezberdinak erakustea izango da” Ainara Billalabeitia Bizkaiko Trikitilarien Elkarteko ordezkariak gaurko prentsaurrekoan adierazi duenez. Koldo Iturbek Getxoko Udaleko Kultura zinegotziak bere aldetik, “jaialdia egungo gobernu taldeak euskararekin eta euskal kulturarekin daukan konpromisoaren beste adierazpen bat dela” azpimarratu du. Jaialdia udalerrian egiten den bigarren urtea da aurtengoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun