Algorta, Aramaio, Arrasate, Bilbo, Donostia, Gasteiz... 200 lagun inguruk egin dute gaur, Langraizko espetxera martxa, Anjel Figueroa algortarra, Jon Agirre aramaioarra, Josu Uribetxebarria arrasatearra eta bertan dituzten gainontzeko preso gaixoen askatasuna eskatzeko asmoz. Mendian gora joanda, hiru euskal preso politikoak dauden Erizaintzako modulua aurrez aurre izan dute etengabe martxistek. Eurek botatako elkartasun aldarriei, lehendabizi leihora ikurrina ateraz eta ondoren beraiek ere oihukatuz erantzun diete presoek. Nahiz eta fisikoki urrun egon, bertaratutako lagunek argi eta garbi aditu dituzte barrote artetik heldutako "Aurrera bolie!" bezalako oihuek. Horien artean izan dira, besteak beste, Anjel Alcalde preso ohia eta eztarria urratu beharrean oihu egin duen Josepa Arregi Etxerat elkarteko lehendakariak. Bitartean, espedientea zabaldu dio Ertzaintzak Mari Karmen Fernandez Figueroaren amari, kontzentratzeko baimena espetxe aurreko zubiaren bestalderako zela argudiatuta. Komunikatzeko orduan, protesta kartzela inguruetan izango zela adierazi zitzaien Herrizaingo Saileko arduradunei. Argazki gehiago ikusi.
Elkartasuna ahalik eta gertuen adierazteko asmoz, autobus eta kotxeak Biloda herrian geratu eta mendian gora abiatu dira martxistak, Langraizko espetxea inguratu eta kartzela atzealdera begira kokatzeko asmoz. Protesta atari aurrean izango zela uste zuten polizia arduradunek eta bertan kokatu dituzte Ertzaintzaren Brigada Higikorreko hainbat dotazio. Batutako jendearen oihuek ohartarazita, baina, mendian gora espetxerantza, bidea moztu die polizia autonomikoak, bertan egoteko baimenik ez zutela argudiatuta. Gora behera handiegirik gabe, atzera egin eta beherako kontzentratu dira Algorta, Aramaio, Arrasateko, Bilbo, Donostia eta Gasteiz bertatik hurbildutako herritarrak. Presoek ere agudo entzun dituzte aldarriak eta ikurrinak ateraz eta oihukatuz erantzun dute. Geroago, goizez bisita eduki duen Mari Karmen Fernandez Figueroaren amarekin bat egin dute lagunek, preso gaixo algortarra, Uribetxebarria eta Agirre dauden Erizaintzako modulu aurrean kokatuz. Momentu hunkigarriak izan dira horiek. Izan ere, barrote artetik, bildutako jendeari keinuka ibili dira etengabe hiru euskal preso politikoak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun