Imanol Landa alkatearen (argazkian) arabera, getxoztarrak "nazkatuta" daude ETAko "aberriaren salbatzaileek" udalerria "erabiltzen" dutelako ekintza terroristak burutzeko. Getxoko Justizia Jauregi inguruan bertan egin ditu adierazpenak udal agintariak. Landak atentatu saiakera gaitzetsi du "irmotasun handienarekin". ETA euskal herritarrekiko "erabateko banantzean" dagoela uste du berak. Marisa Arrue Getxoko PPko bozeramaileak, bere aldetik, ETAko "hiltzaileekin serio eta irmo" jarri dadin eskatu dio Espainiako Gobernuari. Zehazki, Jose Maria Aznarren Gobernuaren terrorismoaren aurkako politikara itzultzea eskatu dio, "emaitza onak ematen zituelako" eta "gaitz hori amaitzeko modu bakarra delako".
Paulino Luesma Espainiako Gobernuak EAEn duen ordezkariak ere gogor gaitzetsi du atentatu saiakera. ETA eta haren "akolitoak" erabat "mespretxatzen" dituela esan du. Gainera, "ETAko askasunaren hiltzaileek", Zuzenbide Estatuaren "botere eta instituzioen irmotasuna" ez dutela suntsituko ohartarazi du, "baizik eta haien aurka egiteko indartzen gaituzte". Bestalde, Rodolfo Ares PSE-EEren Antolakuntza idazkari eta bozeramaileak Ertzaintza zoriondu du profesionaltasunez lan egiteagatik eta "Euskadin mina egiteko bonbak jarri nahi dituztenen aurka egiteagatik". Aresen ustez, beharrezkoa da animoak eman eta babesa adieraztea "demokrazia eta askatasuna" defendatzen duten profesionalei. Ezker Batuaren presidentziako bozeramaileak, Mikel Aranak, berriz, euskal gizartearen "ahotsa" entzuteko eta "biolentzia alde batera utzi eta bere desegitea iragarri dezan" eskatu dio ETAri. EBko agintariak "aldarrikapenak ezker abertzaliari" uzteko gomendatu dio talde armatuari. Ezker abertzaleari Anoetako Adierazpenari heltzeko eskea luzatu dio, horrek "ideia politiko eta demokratikoen konpromezua defendatzen zuelako". Eusko Alkartasunak ere "behingoz desagertzea" exijitu dio ETAri, "euskal jendartearen gehiengoak bakean bizi eta giza eskubide guztiak errespetatzearekin bat datorrelako".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun