Getxoko Udalaren Bozeramaileen Batzordeak hartutako akordioa:
Ertzaintzaren kontra ETAk Getxoko Epaitegietan atzo, igandean, azaroaren 11n burututako eta huts egin zuen atentatuaren aurrean, Getxoko Udaleko Bozeramaileen Batzordeak honako hau adierazi nahi du:
1.- Atentatu saiakeraren kontrako erabateko gaitzespena eta pertsonen biziak mespretxatzen, beren helburuak lortzeko, edozein izanda ere, terrorismoa eta indarkeria praktikatzen dutenekiko arbuioa
2.- Gure udalerria aipatutakoa bezalako ekintza terroristen leku berriro ere bihurtu izanagatik bere nazka eta gogaitasuna eta ETAri behingoz gure gizartea elkarbizitzan eta bakean bizitzen uzteko eskakizuna.
3.-Ertzaintzarekiko eta bereziki lehergailuak indargabetze lanetan zaurituta geratu diren bi ertzainekiko erabateko elkartasuna eta atxikimendua; baita Justizia Administrazioko langileekiko ere.
4.- ETAri behin betiko eta berehala desagertzeko eskakizuna, era horretan euskal gizartearen gehienen borondatea errespetatuz.
5.- Eta azkenik, Bozeramaileen Batzordeak dei egin nahi du, zuzenbide estatuak dituen baliabideetatik eta batasun demokratikotik, danok terrorismoari zilegitasun politiko eta soziala kentzeko lan egin dezagun.
Getxon, 2007ko azaroaren 12an
Getxoko Udalaren Bozeramaileen Batzordea goizean bildu da atzo ETAk, Negurin dagoen justizia jauregiaren aurrean, bi lehergailu jarri izanak gaitzesteko. Batetik, "nazka eta gogaitasuna" adierazi diote erakunde armatuari, tokiko erakundean ordezkaritza duten alderdiek, "udalerria aipatutakoa bezalako ekintza terroristen leku berriro ere bihurtu izanagatik". ETAri "behin betiko eta berehala desagertzeko" eskatu diote. Are gehiago, "zuzenbide estatuak dituen baliabideetatik eta batasun demokratikotik, danok terrorismoari zilegitasun politiko eta soziala kentzeko lan egitera" deitu dute EAJk, PPk, PSE-EEk eta Ezker Batuak. Goizean zauritu diren ertzainei ere elkartasuna adierazi diete. Argazkian, Getxoko udaletxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun