Umeen izen-ematea burutzeko hainbat paper eraman beharko dute gurasoek: inskripzio orria beteta, umeen Osakidetza txartelaren fotokopia eta diru sarreraren ziurtagiria, 50 eurokoa bazkideen kasuan eta 65 eurokoa bestelakoetan. Paper guztiak emateko Algortako Karitate kaleko 1. atarian dagoen Aldai Patronatura jo beharko dute. Bertan, sotoan dagoen 10. bulegoan dena utzi ahal izango dute egun eta ordu hauetan: astearte eta ostegunetan, 16.30ak eta 19:00ak bitartean; eta astelehen, asteazken eta ostiraletan, berriz, 10:00ak eta 13:30ak bitartean. Edozein zalantza argitzeko, 944 914 357 telefonora deitu edo bizarralepoan[abildua]euskalnet.net posta elektronikora idatzi daiteke.
Irteerak
Bizarra Lepoanek aurreratu duenez, bi irteera izango dira, abenduaren 27an eta urtarrilaren 3an, baina oraingoz biak daude konfirmatzeke, "Olentzeroren eta Odon Elorzaren zain". Izan ere, eta ezustekorik ezean, umeek Olentzero bisitatzea izango dute Mungiako bere etxean. Bestalde, Odon Elorzari ez diote bisitarik egingo, baina bai Donostiako Udalak duen Irristaketa pistari. Lehenengo aldia izango da Bapirukeko kideek pista horretara jotzen dutela, aurretik Gasteizko bidea hartzen ohi baitzuten. Baina, begiraleek elkarteari emandako txostenetan argi geratu da nekeza dela bertan umeen artean euskara sustatzen saiatzea, bertako gehiengoek gaztelaniaz aritzen diren bitartean.
Bapigabonak umeek Gabonak euskaraz gozatzeko ekimena antolatu du Bizarra Lepoanek
Getxo udalerriko Bizarra Lepoan euskara elkarteak 5 eta 12 urte bitarteko ume euskaldunentzako kolonia irekiak antolatu ditu Gabonetara begira. Izan ere, abenduaren 26tik urtarrilaren 4ra, Bapiruke egitasmoaren ekimen berezia abiatuko dute euskara elkartekoek eta umeek hainbat jolas, tailer eta irteeraz gozatu ahal izango dute Itzubaltzeta / Romoko Romo eskola eta Algortako Zabala ikastetxea ekintzetarako abiapuntua hartuta. Goizane Miruri Bizarra Lepoaneko dinamizatzaileak jakinarazi duenez, 92 ume batu ziren iaz eta litekeena da aurten hortik gora ibiltzea, "umeek primeran pasatzen baitute elkarrekin eta jagoleekin jolasten". Gainera, "horrela ezagutzen ez dituzten beste umeekin harremanak euskaraz sortzen dituzte", Mirurik azpimarratu duenez. Bapirukeren asmoa baita umeek euskara bereganatzeko aisialdiaz, alde ludikoaz, gozatzea, "euskara ikasgelako hizkuntza soilik izan ez dadin, batez ere familian hitz egiteko aukerarik ez duten umeen kasuan". Bazkideek astelehenetik aurrera, azaroak 19, egin ahal izango dute izen-ematea, hilaren 28ra arte. Ondoren, abenduaren 3a eta 11 bitartean, bazkideak ez direnen txanda izango da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun