Artea merkataritzagunean bi greba egun deitu ditu ELAk

ELA sindikatuak sei greba egun deitu ditu Bizkaiko merkataritza alorrean, eta haietariko bi Leioako Artea merkataritzagunean burutzeko asmoa du. Protesten datak azaroaren 22a, datorren asteko osteguna, eta urtarrilaren 8a dira. ELAren arabera, "ia hiru urte hitzarmenik gabe gaude, sei greba egin ditugu merkataritzako sektoreetan eta langileen egoera batere inporta ez dion patronalaren aurrean, sektoreko egoera gero eta larriagoa da". Gainera, CEBEK Bizkaiko enpresarioen elkartea "ez negoziatzeko politikarekin jarraitzen du eta gero eta urrunago doa". Izan ere, sindikatu abertzaleak salatu duenez, oraindik sinatzeke dauden Ehungintza, Merkataritza orokorra, Metal eta Altzari merkataritza arloetako hitzarmenen negoziaketa denboran gehiegi luzatzen ari dela eta, 2005 eta 2006 urteak itxitzat jo ditu patronalak, hau da, "bi urte horietaz ahaztu egin behar dugula eta 2007az bakarrik hitz egin nahi duela esanez. Hau ez da negoziaketa, CEBEKen aldetik inposaketa hutsa baizik".