Anjel Figueroa preso politiko algortarra atzo iritsi zen Kordobako espetxera, joan den ostiralean Langraitzetik atera ondoren. Gau horretan Burgosen atake epileptikoa izan eta larunbatean eraman zuten Valdemorora (Madril). "Familiarrak espetxera joan ziren, baina Anjel bertan egon arren, ez zieten bisita egiten utzi. Valdemoron ere beste krisialdi bat izan zuela adierazi die senideei presoak, nahiz eta ondo gogoratu ez. Izan ere, bakarrik izan dute ziegan", jakinarazi du Uribe Kostako Amnistiaren Aldeko Mugimenduak Etengabe bitakoraren bitartez. Bada, Kordobarako bidean beste atake epileptiko izan omen zuen. Izan ere, "berak ez du gogoratzen baina guardia zibil batek esan zion berak artatu zuela, lurrean etzanda izan zutela… baina besterik ez", azaldu du errepresioaren aurkako erakundeak. Aipatu beharra dago atake epileptikoez gain, memoria galera, absentziak eta haluzinazioak izaten dituela Figueroak. Guzti hori salatu eta presoaren askatasuna aldarrikatzeko mobilizazioa deitu dute biharko, 20:00etan, Algortako Telletxe plazatik abiatuta. Argazkian, azaroaren 9an 200 bat lagun manifestatu ziren Figueroaren askatasunaren alde.
Bestela ere, orain argitu da Fuigueroa epaiketa baterako eraman dutela Kordobara. "Hilaren 19an egingo diote eta 2007ko maiatzean Kordoban konduzioan eman zioten jipoiaren salaketaren inguruan izango bide da. Dena dela, ez dakigu berak egindako salaketaz edo guardia zibilek eurek egindako beste salaketa izan daitekeen", adierazi du AAMk. Orduan ere, beste atake epileptiko bat izan zuen eta konortea galdu, gero zertzelada batzuk besterik gogoratzen ez zuela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun