Zortzi sindikatuek uko egin diote "zifren arteko gerra batean sartzeari", baina pozik agertu dira lanuzteak izan duen erantzunarekin. Zentro guztietan jarraipena "zabala eta handia" izan dela nabarmendu dute, %90 ingurukoa euren hitzetan. Gaurko ezarri diren gutxiengo zerbitzuak "gehiegizkoak" izan direla iritzi diote, nolanahi ere, bete egin dira. Osakidetzako Zuzendaritzak, ordea, lanuztearekin %30,24k baino ez duela bat egin adierazi du. Grebaren jarraipenaren emaitzak kontuan hartuko dituela adierazi du, eta sindikatuek ere berdina egingo dutela espero du. 4.770 beharginek egin dute greba, Osakidetzak emandako datuen arabera.
Bilera azaroaren 23an
Sindikatuek jakinarazi dutenez, mahai sektorialaren bilera azaroaren 23ra atzeratu dute, Gabriel Inclan Osasun sailburuak Eusko Legebiltzarrean azalpenak eman eta hurrengo egunean. Hasiera batean, bilera azaroaren 20an izango zela iragarri zuen Inclanek. ELAk eta LABek joateko prest daudela adierazi dute. Osasun Sailak urriaren 10ean sinatutako Lan Baldintzen Akordioa dago lan gatazkaren atzean. Medikuen sindikatuekin soilik hitzartu zuen.
Gorlizko erietxeko zuzendaritzak "greba oztopatzen" saiatu dela salatu du LABek
2007ko aza. 15a, 23:24
Txaro Martinez LAB sindikatuko ordezkariaren esanetan, 8:00ak eta 11:00ak bitartean deitutako lanuzteak "jarraipen zabalarekin" hasi dira, "espero genuen bezala". Martinezen arabera, Eusko Jaurlaritzak gaurko ezarritako gutxieneko langileez aparte, hain zuzen, Gurutzetako eta Galdakaoko ospitaleetan, "zerbitzuetako asko itxita egon dira" eta Txagorritxu Gasteizko zentroan "inor ez da lanean egon, ez kanpo kontsultetan, ezta laborategian ere". Hala ere, LABek deitoratu egin du "zenbait zentrotako zuzendaritzak greba oztopatzen saiatu" direla txanda-aldaketa batzuk saihestuta, "San Eloy eta Gorlizko zentroetan (argazkian), kasu". ELA, SATSE, LAB, CCOO, UGT, ESK, UTESE eta SAE sindikatuek iragarri dute elkarlanean jarraituko dutela eta Osakidetzako zuzendaritzak "orain arte agertu duen negoziaziorako borondate hutsari eusten badio" protestekin aurrera egingo dutela aurreratu dute.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun