Plentzian bi gazte atxilotu dituzte metroan bi graffiti handi margotzea leporatuta
2007ko aza. 19a, 17:23
Getxoko ertzain-etxeko agenteek bi gazte atxilotu zituzten atzo arratsaldean Plentzian, metro bagoi batean bi pintada egitea egotzita. Eusko Jaurlaritzako Herrizaingo Sailak zabaldutako oharraren arabera, udalerri horretako geltokian bertan izan zen gertaera, 16:20ak aldera, trena bertan geldirik zegoela. Treneko gidariak bi gazte ikusi omen zituen, bagoi baten ezkerraldean pintadak egiten. "Egiten ari zirena aurpegiratu zien orduan, eta, ikusi zituztela konturatzean, ihes egin zuten", diote polizia iturriek. Metroko arduradunek Ertzaintzari gertakariaren berri eman zioten eta bi susmagarriak bilatzeari ekin zioten. Pixka bat geroago, lekukoek emandako deskribapenarekin bat zetozen bi gazte aurkitu zituen patruila auto batek, geltokitik gertu, inguru basotsu batean. Argazkian, graffitia metro unitate batean / Olakoena.Ertzainek atxilotu egin zituzten, kalte delitu bat leporatuta. Izan ere, bagoi baten alde batean bi graffiti handi, bi eta hiru metrokoak, zeudela ikusi zuten. Atxilotuok, J.L. (24 urte) eta J.H. (20 urte) polizia egoitza batera eraman zituzten, beharrezko eginbideak egin eta, gero, epailearen esku uzteko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun