"El cuento de la lechera"
Hormako erlojuak jo du. Bederatzi kanpai-hots. Gaua da, ohera joateko ordua, loa eragiten duten ipuinen ordua. Bi anai-arrebaren, Julia eta Martínen, logela da; bat-batean eta jolas modura, beraien ametsak, kontzientearen ametsak, irudikatzen hasiko dira, oraindik itzarrik daudela. Gaua hasi besterik ez da egin. Baina zarata eta arau-haustea dela eta, amak isilik egoteko aginduko die, eta lasaitzeko, La Fontaineren “Esnesaltzailearen ipuina” irakurriko die, egokiena baita ameslari-familia batentzat. Musuak, estali, “gau on” eta argia itzali da. Iluntasuna egin da nagusi, eta ametsak eta irudimena sartu dira argiaren espaziora. Anai-arreben artean, zurrumurruak. Ipuinari buruz ari dira hitz egiten, eta, batez ere, beraiek pegarrean sartuko lituzketen ametsei buruz. Eta pixkanaka-pixkanaka, logurak, nekeak, hartuko ditu eta beste amets mota batera eramango ditu, inkontzientearenera.
"Niña Frida"
Emakume heldu batek, Frida Kahlok, zuri dagoen mihisearen aurrean bere bizitzako iragandako uneak gogoratuko ditu... Mundura etorri zenekoa, sei urte zituela izan zuen gaixotasuna, aitak zuri-beltzezko argazkiak koloreztatzen irakasteko izan zuen pazientzia. Gogoratzen ditu... izan ez zituen lagunak, umetako etsipenak, beti jendez inguratuta egon arren hazten zihoala bizi izan zuen bakardadea. “Ametsezko lagunarekin” egindako jolasak. 18 urte zituela izan zuen istripu ikaragarria... Baina, horretatik guztitik, bera bizitzeko gogo itzelekin geratzen da, aurrera etengabe egiteko asmoarekin, eta, batez ere, egunetik egunera bere burua gainditzeko nahiarekin, saminari bere eskuko hatzetatik ihes egiten utzi eta edertasun bihurtuz...
La Fontaineren ipuin ezagunean oinarrituta, "El cuento de la lechera (vamos a romper cantaros)" izenburuko antzezlana (argazkian) taularatuko du igande honetan, azaroak 25, Kultur Leioako auditoriuman, Factoria Teatro konpainia madrildarrak. Eguerdiko 12etatik aurrera izango den saiora joateko, 4 eurotan egongo dira sarrerak salgai. Bestalde, abenduan burua sartu bezain laster, hilaren 1ean, beste antzezlan batekin gozatzeko aukera izango dute, kultur areto horretan bertan, neska mutilek. Oraingo honetan, "Niña Frida" lana antzeztuko dute Karlik Danza Teatro taldekoek, eta eguerdian beharrean, arratsaldeko 6etan eskainiko dute saioa. Horretarako ere 4 eurotan izango dira txartelak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun