Justizia Sailaren prentsa oharra:
Justizia Sailak salaketa jarri du Getxoko epaitegiko kamerek hartutako bideoa filtratu izanagatik
Eusko Jaurlaritzaren Justizia, Lan eta Gizarte Segurantza Saileko segurtasun-arduradunak gaur eguerdian salaketa jarri du Getxoko Epaitegiko guardiako epailearen aurrean, azaroaren 11n eraikin judizialeko kamerek grabatutako bideoa filtratu dutelako.
Justizia Jauregiaren eta jasotako bonba-abisuagatik bertara joan ziren ertzainen aurkako atentatu zapuztuaren egun berean, Sailak 45 minutuko grabazioa zuen DVDa eman zien —idatzizko eskaerari erantzunez, eta jaso izanaren agiria sinatuta— Ertzaintzari, Polizia Nazionalari eta Guardia Zibilari, gertatutakoa ikertzeko.
Bideoa komunikabide bati filtratu zitzaion, eta horrek atzo irudiak eman zituen; hori dela-eta, Justizia Sailak salaketa egin nahi du, “segurtasun-gaiak bere arloaren baitan ikertu beharrekoak direlako. Tamalgarria eta guztiz arduragabea iruditzen zaigu garrantzi horretako gaiak, ikerketa polizial eta judizial baten parte direnak, komunikabideetara filtratu izana”. Hori dela-eta, gertakarien berri eman diogu Guardiako Epaitegiari, dagokion ikerketa egin behar den baloratu dezan.
Eusko Jaurlaritzako Justizia Sailak salaketa jarri du gaur, hilaren 11an Getxoko epaitegien aurkako atentatu saiakeraren bideoa hainbat komunikabideetara ailegatu ondoren. Egun horretan, bi ezezagunek lehergailu bana jarri zuten Getxoko Justizia Jauregiaren fatxadan eta inguruko paperontzi batean, eta irudiak bertako segurtasun-kamerek grabatu zuten. Bideo horiek, guztira 45 minutu, Ertzaintzaren, Espainiako Poliziaren eta Guardia Zibilaren esku utzi zituen Justizia Sailak, eta erabat konfidentzialak ziren. Baina, atzo, ETAren izenean burutu zen atentatu saiakeraren irudiak hedabide batek zabaldu ostean Justizia Sailak salaketa jartzea erabaki du, ohar baten bidez adierazi duenez, "arduragabekeria baita horrelako gai garrantzitsu bat, ikerketa judizialaren eta polizialaren baitan dagoena, komunikabide bati filtratzea". Auzia, orain, epaileen esku dago. Argazkian, ETB2 telebista kateak zabaldutako hilaren 11ko irudietako bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun