Anjel Figueroa gaixotasun kroniko eta sendaezina duen Algortako preso politikoa atzo epaitu zuten Kordobako epaitegian, Uribe Kostako Amnistiaren Aldeko Mugimenduak Etengabe bitakoran jakinarazi duenez. AAMren arabera, fiskalak 30 eguneko 5 euroko isuna eskatu zuen, hau da, 150 euro, "autoritatearen errespetuaren kontrako falta" egotzita. Epaiketa hori zela eta, hilaren 8an eraman zuten Figueroa Euskal Herritik eta, aste batez leku-aldatzean ibili ostean, 14an heldu zen Kordobara. Aurreko beste leku-aldaketa batean miaketari uko egin eta guardia zibilei iraindu eta ostikoka hasi izana leporatu zioten atzoko epaiketan, bere garaian Guardia Zibilek egin zuen salaketaren harira. Bertsio horren arabera, agenteek Figueroa heldu eta lurrean atxiki zuten arauzko miaketa egiteko. Algortarrak, ordea, miaketan oinetako kordelak kendu eta entregatzeko eskatu ziotela eta berak horrek zentsurik ez zuela adierazi ostean guardia zibil batzuek bizkarraldetik oratu eta lurrera bota zutela azaldu zuen. Lurrean, atake epileptikoa jazo eta konortea galdu zuen eta medikuak aurpegian zaplastekoak ematen ziola itzuli zen bere senera. Argazkian, pasa den larunbatean Anjel Kalera! herri ekimena abiatu zuten 50 bat algortarrek.
Baina, AAMk azaldu duenez, "Anjelek hori guztia jendaurrean salatu zuen, baina epaitegian ez zuen salaketarik ipini dagoeneko salaketak ipintzeaz nazkatuta dagoelako, bere abokatuari esan zionez, zakarrontzira bota eta gehienetan ezertarako balio ez dutelako". Bestalde, Figueroa Kordobako espetxe erizaindegian dago, beste bi presorekin batera ziega berean, eta martxora arte ez du izango hurrengo kontsulta Gurutzetako bere medikuak horrela erabaki ostean. Azkenik, Mari Karmen Fernandezek atzo "Gara" egunkariari eskainitako elkarrizketan "nire semea euskal preso politikoa izango ez balitz kalean egongo litzatekeela" salatu zuen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun