EHUko Errektoretzak kaleratutako oharra:
Atzo, azaroaren 19an, Bizkaiko Campusean UPV/EHUko ikasle batek izandako erasoa dela eta, erakunde honetako Errektoregoak babes eta elkartasun osoa eskaini nahi dio ikasle horri eta, era berean, adierazi gura du erabat errefusatzen dituela mota horretako ekintza bortitzak.
Unibertsitateak, gogo hezitzaile eta balio igortzaile den heinean, konpromiso sendoa dauka demokraziaren printzipioekin eta oinarrizko askatasunekin. Unibertsitatea errespetuaren bultzatzaile eta ideien defendatzaile da, horretarako hitza duela bide. Horixe aldarrikatu nahi dugu. Berton ez dago larderiarako edo mehatxurako tarterik, eta, beraz, inork ezin izango du bortizkeriaz jokatu, ezta horrelako portaerarik justifikatu ere, helburu politikoak edo bestelakoak lortzeko. Era guztietako bortizkeria gaitzesten dugu, edozein dela ere horretarako arrazoia; eta gogorarazi nahi dugu UPV/EHUko kideren batek jasandako indarkeriak edo bortizkeriak kide guztiei eragiten diela, eta portaera totalitario horiek guztiok bortxatzen gaituztela.
Leioa, 2007ko azaroaren 20a.
Albiste agentziek jasotakoaren arabera, Leioa eta Erandioko campusean txanodun talde bat eraso egiten saiatu zela salatu zuen atzo bertako ikaslea den andra batek eta, gaur bertan, gaitzezpen idatzia plazaratu du Euskal Herriko Unibertsitateko Errektoretzak. Emakumeari "babes eta elkartasun osoa" eskaintzeaz gain, "unibertsitatea errespetuaren bultzatzaile eta ideien defendatzaile" dela adierazi dute EHUko agintariek, "horretarako hitza duela bide". "Berton ez dago larderiarako edo mehatxurako tarterik, eta, beraz, inork ezin izango du bortizkeriaz jokatu, ezta horrelako portaerarik justifikatu ere", gaineratu dute. Argazkian, Erandio eta Leioako campuserako sarrera nagusia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun