Getxoko Euskal Kulturaren Jardunaldietan, bere azken ikuskizuna estreinatuko du ostegun honetan, azaroak 22, Ander Lipusek. Hain zuzen ere, VII. Umore Jardunaldien barruan, “Hala mintzatu zen Zapatustra” inprobisazio ikuskizuna eskainiko du The Piper´s taberna irlandarrean, 20:00etatik aurrera. Markinarrak azaldu duenez, azken hilabeteotan egindako lanaren emaitza da obra eta bere nondik norakoa publikoaren jarreraren eta partaidetzaren araberakoa izango da. “Horregatik ez dakit zenbat iraungoko duen, ordu bat, bi ordu edo lau”, aitortu du gaurko aurkezpenean aktoreak. Berarekin batera, antzezpenean, Sagarroi taldeko tronboi jole Asier Ituarte ondarrutarrak, Nia Kosta aktoreak eta Markinako Abarka antzerki taldeko kide batzuek ere parte hartuko dute. Sartzea musutruk izango da. Argazkian, Lipus bera partaide duen "Bertsotranpak" ikuskizuneko pasartea.
"'Hala mintzatu zen Zapatustra' zer den? Eguenean kontauko doutsuet", bota du hitza hartu bezain laster Ander Lipusek. Izan ere, biharko saioa nolakoa izango den berak ere ez dakiela aitortu du aktore markinarrak. Inprobisazioan oinarrituz, ikusleek zelan erantzuten duten araberakoa izango da obra berriaren antzezpen bakoitza, gaineratu duenez. Alabaina, kazetariek albistea nola edo hala osatu behar zutela ikusita, antzezlanaren nondik norakoak zerrendatzen hasi da Lipus. Bada, "GTI izeneko antzerki talde berri batek" antzeztutako obra izango da biharkoa: "Grupo de Teatro Inexistente" delakoa. Horrenbestez, ikuskizunean pertsonaia ugariri emango die bizitza Lipusek. Horietariko batzuk aktoreak berak, Andoni Egañak eta Xabi eta Fredi Paia bertsolari algortarrek duela bi urte martxan jarri zuten "Bertsotranpak" showan izandako bizipenetan oinarrituak: Juan Junda psikotikodepresiboa, Eusebio Egaña bandoleroa –Lipusen esanetan, abizen bereko bertsolari Andoni izan daitekeena– eta Lekeitioko "skracher"-a, besteak beste. Zeintzuk agertuko diren momentuan erabakiko du aktoreak. Finean, "Algorta alaitzea" du helburu “Hala mintzatu zen Zapatustra” antzezlanak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun