"Harrabots!" aldizkariak Donostian ospatuko du bihar bere lehenengo urteurrena

Euskal Herriko Unibertsitateko (EHU) ikasleek sorturiko "Harrabots!" euskarazko aldizkariak I. Harrabots Eguna egingo du ostiral honetan, azaroak 23, Donostiako Kafe Antzokian (DOKA), bere lehenengo urtemuga ospatzeko. Horrela, 17:00etatik aurrera, jaia, hitzaldiak eta Zarauzko Oteiza Lizeo Politeknikoko "Kalapita" aldizkariko arduradunek eginiko erakusketa txiki bat izango dira bertan. Argitalpenaren arduradunek prentsa ohar bidez jakinarazi dutenez, "Harrabots!" ikasleen dinamizazioa eta euskararen sustapena bultzatzeko asmoz sortu zuten. Helburu biak "behar bezala" betetzen ari direla ziurtatu dute. Unibertsitateko hamar ikaslek jarri zioten "Harrabots!" izena aldizkariari, "bere helburua zalaparta eta iskanbila sortzea zelako, hau da, harrabotsa". Modu honetan, eta aldizkariaren lehenengo urteurrena ospatzeko asmoz, festa bat antolatu dute biharko, zenbait jarduera kulturalekin eta Garabi eta Ipar Haizea zarauztarren eta Kea beasaindarren kontzertuarekin.