Arkaitz Goikoetxea Basabe, 27 urte duen Barakaldoko semea eta Getxoko auzokidea, "kale borrokan ibilbide luzea egin" ei du, Ertzaintzak leporatzen dionaren arabera: "1995 eta 2005 bitartean, ekintza kopuru garrantzitsu batean parte hartu zuen, Poliziaren patruila-autoak barne. 2000n hainbat hatz galdu zituen etxe-lehergailu bat eztanda egin zitzaionean eta atxilotua izan zen Espainiako Gobernuaren Arabako Azpiordezkaritzaren aurkako eraso batean parte hartzeagatik. 2002an berriz atxilotua izan zen Galdakaoko Guardia Zibilaren aurkako erasoagatik. 2003tik aurrera ihes eginda dago".
Jurdan Martitegi, Euskal Poliziaren aburuz, "ETAren ustezko kidea da", orain dela urte bat ihes eginda eta aurretik bitan atxilotu dutena: 1997an, kale istiluak egotzita atxilo eraman zuten eta 2000an Galdakaoko banku bulego bati eraso egin izana leporatuta. Era berean, Poliziaren iritziz, "ia bi metroko garaiera duen eta 85 bat kilo pisatzen duen ustezko ekintzaile hau kale borroka ekintza ugarirekin, 2000ko urtarrileko Iurretako auto-etxe batean izandako sutearekin eta pasa den abuztuan Durangoko kuartelaren aurkako erasoarekin lotzen zaio".
Goikoetxea eta Martitegiri leporatu diete Neguriko epaitegiaren aurkako atentatu saiakera
Ertzaintzak Arkaitz Goikoetxea Basabe getxoztarrari eta Jurdan Martitegi Lizaso durangarrari egotzi die hilaren 11n Neguriko Justizia Jauregian bi lehergailu jarri izana. Bi gazteen argazkiekin batera komunikabideei bidalitako prentsa-oharrean, Herrizaingo Sailak dio "azken asteotan Ertzaintzaren ikerketa kriminalaren adituek" Neguriko epaitegiaren kanpoaldean "izandako atentatu saiakerarekin lotutako hainbat ebidentzien azterketan lan egin" ostean "jaso dituzten zantzuen arabera" Goikoetxea eta Martitegi "liratekeela" bi lehergailuak jarri zituztenak. Era berean, pasa den abuztuan Durangoko Guardia Zibilaren kuartelaren aurkako erasoa ere leporatu diete 27 urte duten bi gazteei. Ertzaintzak zabaldutako bertsioari jarraiki, Martitegi "ETAren ustezko kidea" litzateke, orain dela urte bat ihes eginda. Goikoetxearen kasuan, berriz, "kale borrokan ibilbide luzea egin" duela dio Herrizaingo Sailak. Dagoeneko, Ertzaintzak Goikoetxea eta Martitegi Neguriko atentatu saiakerarekin ustez lotzen ei duen informazio guztia Espainiako Auzitegi Nazionalari, Guardia Zibilari eta Espainiako Polizia Nazionalari igorri die.Argazkian, ETB2 telebista kateak zabaldutako hilaren 11ko irudietako bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun