Udalbiltzaren agiria:
Azaroak 25, emakumeen kontrako indarkeriaren aurkako eguna
2007. urteko azaroaren 25ean, emakumeen kontrako indarkeriaren inguruko datuek egoera gordinean gaudela erakusten digute, egunez egun larritzen ari den egoeran, gero eta bortitzagoa den egoeran.
Indarkeriaren biktimak ez dira bakanak eta ustekabekoak, jendartearen antolaketa hierarkikoaren ondorio zuzena baizik, egiturazko egoeraren ondorio.
Guztiok dugu zereginik horri guztiari aurre egiteko eta bereziki instituzioak, horrelako gertaerak jazotzen direnean, ezin diegu bizkarra eman. Erasoak salatu eta prebentzioa lantzeaz gain, indarkeria txoko eta momentu guztietan ematen dela eta jendartean dugun eredu patriarkalak eragiten du azpimarratzea ezinbestekoa dugu.
Esan bezala, ingurumari honetan, erakundeen erantzukizuna nabarmentzekoa da, beharrezkoak diren prebentzio eta laguntza osoak eta eragingarriak hartu eta eskaini behar baititu: egoera lazgarri hau amaiaraziko duten bitartekoak, Euskal Herri osoan eta euskal emakume guztientzat. Norbere burua zuritu eta egoera isiltzeko legeez eta sasi prebentzioaz haratago, premiazkoa dugu eragingarriak izango diren bideak irekitzea, egiturazko arazoari aurre egiteko.
Bide horretan, Udalbiltzak bere konpromisoa berretsi eta dei egin nahi dio euskal jendarteari, azaroaren 25ean emakume mugimenduak antolatu dituen mobilizazioetan parte hartzeko.
Emakumeen kontrako indarkeriaren aurkako mobilizazioetara deitu du Udalbiltzak
Igande honetan, hilak 25, Emakumeen Kontrako Indarkeriaren aurkako Nazioarteko Eguna dela eta emakume mugimenduak deitutako mobilizazioetan parte hartzera deitu du Udalbiltzak. Atzo kaleratutako agirian, euskal udal hautetsien eta udalerrien erakundeak "emakumeen kontrako indarkeriaren inguruko datuek egoera gordinean gaudela" nabarmendu du. Gainera, arazoa gero eta "bortitzagoa" dela ere jakitun da Euskal Herriko lehenengo instituzioa. Horregatik, emakumeen aurkako erasoak kasu isolatuak bezala balira ikusi beharrean, "jendartean dugun eredu patriarkalaren" eragin zuzena direla zehaztu du Udalbiltzak. Hori dela eta, emakumeen eskubideekin duen konpromisoa berretsi eta euskal jendarte osoa igandeko mobilizazioetan parte hartzera deitu du erakundeak. Argazkian, emakumeen aurkako erasoak salatzeko, Getxoko Bilgune Feministak Algortan egindako kontzentrazioetako bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun