"La sabiduria de Higea" osasun liburua aurkeztuko dute arratsaldean Itzubaltzetan
Sumendi giza aldaketaren eta osasun autokudeaketaren aldeko taldeak pasa den ekainean argitaratutako "La sabiduria de Higea" liburua aurkeztuko du Itzubaltzeta / Romon. Ekitaldia bertako kultur etxean izango da arratsaldeko 19:00etan, eta bertan Antonio Palomar medikua, nutrizioan aditua eta lanaren idazleak parte hartuko du liburuaren ildo nagusiak jendaurrean azaltzeko. "La sabiduria de Higea" getxoztarraren bigarren liburua da eta "La despensa de Hipocrates" bezala, osasunari estu lotuta dago. Izan ere, 200 bat orrialdetan, Palomarrek hainbat itaun egin eta erantzuten ditu, nagusia honako hau dela: "zergatik pertsona batzuk osasuntsuak dira eta beste batzuk ez?". Bere ustez, arrazoi eta faktore ugari daude, baina, laburbilduz, hiru dira nagusiak: "organismoak eta ingurugiroa edo, nahi izanez gero, gizakien kasuan; gorputz-gogoa, espazio fisikoa eta inguruabar kulturala".
Liburu honetan, Sumendiren sortzaileak osasuna eta gorputzaren gaitasun osatzailea bultzatzeko hiru gako proposatzen ditu: "ezagutza, kaltetzen gaituena baztertzea eta biziberritzen gaituena hartzea. Asko sufritzen duen baina esker onekoa den gorputza dugu. Gure borroka nagusia ohiturak aldatzean eta gure defentsa sistema propio eta naturalak bultzatzean datza".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun