Listuaren test orientagarria egin eta minutu gutxitara merkatuan dauden droga mota nagusien presentzia detektatzen duen sistema bat aukeratu du Herrizaingo Sailak. Azterketa orientagarri hau beste polizia talde batzuek erabiltzen dute gaur egun, Mossos d´Escuadrak eta Erresuma Batuko Poliziak, esaterako.
Isunak
Lehenbiziko azterketa horretan substantziaren bat edo bat baino gehiago hartu izateagatik emaitzak positibo emanez gero, agenteek listuaren beste lagin bat hartuko dute, ondoren Ertzaintzaren Polizia Zientifikoaren laborategira ikertzen bidaltzeko. Azterketa horren emaitza froga gisa erabiliko da isuna jartzeko; 600 euro ordaindu beharra eta gidabaimenaren 6 puntu galtzea, eta baimen hori hiru hilabetera arteko epe baterako kentzea ekar dezake. Azterketa hau egiteari uko egiteak diru eta puntu kopuru berberak ezarrita zigor daiteke.
Agenteek polizia-atestatu bat abiatzea ere izango dute, trafiko segurtasunaren kontrako delitu bat egotzita, positibo emateaz gainera gidaria drogen eraginpean gidatzen ari zela ikusten badute.
Drogak detektatzeko sistema hau Ertzaintzaren ohiko jardunbidearen parte izango da aurrerantzean, eta prebentziozko kontroletan ez ezik istripuak edo arau-hauste
larriak izan direnean eta gidariak sintomak dituenean ere erabiliko da. Orain arte, halakoen aurrean agenteek ospitaleetan egiten ziren azterketak erabili behar izaten zituzten, orain ezarri dena baino askoz ere prozesu zailagoa eta luzeagoa.
Auzitegiko Medikuntzako Euskal Erakundearen datuen arabera, 2006an hil ziren 67 gidariri egindako autopsietan 11k (horien %16,5) positibo eman zuten drogak hartu izateagatik. Kanabisa, kokaina eta psikofarmakoak izan ziren aurkitutako gaiak. "Nerbio-sistema deprimitzen duten drogek (kanabisa eta opiazeoak, besteak beste) gidariaren erreakzio-ahalmena, kontzentrazioa eta erreflexuak murrizten dituzte", Herrizaingo Sailak zabaldutakoaren arabera. Bestalde, substantzia estimulatzaileek (anfetaminak, kokaina eta estasia, esaterako) "gidatzean kontrol-sentsazio faltsu bat eragiten dute, eta, horren ondorioz, koordinaziorik eza, erreflexu-falta eta ikusteko eta entzuteko zailtasunak izaten dira. LSDak eta gainerako droga haluzinogenoek, berriz, errealitatea jasotzeko modua aldatzen dute eta irudipenak sortzen dituzte".
Pasa den asteburutik aurrera, Araba, Bizkaia eta Gipuzkoako errepideetan prebentziozko droga kontrolak egiteari ekin dio Ertzaintzak. Eusko Jaurlaritzako Herrizaingo Sailaren arabera, "listu testak istripuak eta arau-hauste larriak ikertzeko ere" erabiltzen ari dira. Martxan jarritako kontroletan, kanabisa, kokaina, opiazeoak, estasia eta anfetaminak detektatzeko, listu testa erabiltzen da. Testa horretan gidariak positibo emanez gero, orduan laborategiko analisi bat egingo diote. Bertan emaitza errepikatuz gero 600 euro eta gida-baimenaren 6 puntu galduko du gidariak. Probak ezartzeko arrazoi gisa, Herrizaingo Sailak honako datua nabarmendu du: 2006an trafiko istripuz hil ondoren autopsia egin zieten gidarien %16,5ek positibo eman zutela droga azterketetan, Auzitegiko Medikuntzako Euskal Erakundearen datuen arabera. Horrek, "halako kontrolak ezarri nahian aspalditik zebilen" Herrizaingo Sailari ateak ireki dizkio. Halere, hainbat hedabidek laborategiko testak egiteko sistema zalantzan jarri dutenez, Ertzaintzak onartu behar izan du egun ez duela horretarako behar den kromatografoa, baina, azaldu dutenez, Herrizaingo Saila erostear dagoela eta bitartean "listu laginak lan horretarako itundutako erakundeek egingo dituztela, Ertzaintzaren laborategiak ikuskatuta".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun