Atzo jokatu zen Agadirreko (Maroko) uretan Europako Bodyboard Zirkuituko azken proba eta, espero bezala, Eunate Agirrek ez zuen kale egin. Proba gainditzeaz gain, ETBko (European Tour of Bodyboard) txapela jantzi zuen sopeloztarrak. "Bere buruari ezarritako helburua zen hau. Baldintza fisiko eta psikiko onenetan zihoan eta erreztasun handiarekin menperatu du txapelketa", azaldu dute Euskal Herriko Surf Federazioko (EHSF) arduradunek. Izan ere, aurreikusten zen garaipena da atzo erdietsitakoa. Agirre "bodyboarder" euskaldunak aukera anitz zituen titulua lortzeko; rankingeko buru izan da lehiaketan eta, atzo, Europako lehakide bikainena dela baieztatu zuen. Mutilak ere primeran aritu ziren. Baina, zoritxarrez, rankingeko buru Beñat Elosua donostiarrak ezin izan zuen titulua lortu. Azken proba horretan, alde handiz garaitu baitzuen Silvano Lourenço portugaldarrak. Argazkian, Eunate Agirre atzoko proban / EHSF.
Bestalde. Peñatxuri surf taldeak y EHSFk joan den astebururako egindako deialdiarekin 70 lagunek bat egin zuten, federazioak jakinarazi duenez. Ingurumena zaintzearen gaineko jardunaldia zen larunbatekoa. Helburua Gaztelugatxeko Doniene (Bermeo) inguruko itsasbazter eta labarretako zaborra kentzea zen; baita "arrakastatsua" izan ere, surflarien hitzetan. "Eguraldi kaskarra izan bagenuen ere, jende multzo handia parte hartu zuen eta kamioi oso bat bete zen bildutako zaborrarekin; batez ere, botilak eta plastikoak bildu ziren", azaldu dute. Goiz gogor baten ostean, hamaiketako ederraz gozatu zuten partehartzaileek; baita txalaparta soinuez eta bertsoez ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun