Bizarra Lepoan Getxoko euskara elkarteak, Euskal Kulturaren Jardunaldien baitan abiatutako Getxo60 lehiaketetan sms-ak eta bideoak aurkezteko epea ostiralera arte, hilak 30, luzatu egin du euskalgintzako taldeak. Horretarako arrazoia datekin elkartearen eta udal propagandan izandako koordinazio eza izan da, Goizane Miruri Bizarra Lepoaneko dinamizatzaileak jakinarazi duenez. Udalak kaleratutako esku-orrietan "Getxo 60 karaktere" SMS lehiaketaren bigarren edizioan eta "Getxo 60 segundo" izenekoaren lehenengo edizioan lanak aurkezteko epemuga hilaren 24a zela ageri zen. Elkartearenean, berriz, 29an. Hortaz, eta batez ere bideoak muntatzen ibiliko diren lehiakidegaiengan pentsatuz, Bizarra Lepoanek 30era arte zabalduko du epea, ostiraleko 14:00ak arte.
"Getxo 60 karaktere" SMS lehiaketaren bigarren ediziorako mezuak 688 635 350 telefono zenbakira bidali beharko dira, eta eskuko ordenagailua, LG KG 220 sakeleko telefonoa, MP4a izango dira sariak. Gazteen artean hain errotuta dauden ohitura berrietan eragin eta euskararen erabilera sustatzea helburu duen sakelako telefono bidez hartutako bideotxoei buruzko "Getxo 60 segundo" lehiaketarako bideoak, berriz, euskaltube.com webgunera igo eta esteka bizarralepoan[abildua]euskalnet.net-era bidali beharko da. Horretan, Nokia 6111 eta Motorola L7 sakeleko telefonoak edo Kodak Argazki kamara digitala irabazteko aukera egongo da. Gainera, jasotako bideo guztiak www.blogari.net/getxo60 blogean ikusgai egongo dira. Sarien banaketa hilaren 30ean bertan izango da, Algortako Kasinoan, arratsaldeko 8etan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun