Aste betez, unibertsitarioen hitza jasotzen ibili da campusetik campusera EHBE. Atzoko eguerdian, berriz, 50 lagun inguruk egin zuten "kontzentrazio alaia", EHUko Erandio eta Leioako campuseko plaza berrian, "Gaur egungo unibertsitateak aurrera daramatzan inposaketa eta urraduren aurrean, hartu hitza!" lelopean. EHBEk Gaztesarea webgunearen bitartez adierazitakoaren arabera, "inposaketa eta urraketen harresi bat" irudikatu zuten bildutako ikasleek eta, horren gainean, gerturatuek "euren hitza jarri" zuten, "Hartu hitza!" abestia entzuten zuten bitartean. Ekimen guzti hauen bidez, "inposaketen, iruzur eta eskubideen urraketen gainetik unibertsitariook hitza hartzeko prest" daudela "egiaztatu" du euskal unibertsitatearen aldeko erakundeak. Izan ere, Bologna prosezua EHUn eta UPNAn "ematen diren urraketen" muturra besterik ez dela uste du EHBEk. Euren hitzetan, "egungo unibertsitate ereduetan sistematikoki dira urratuak hezkuntza eskubideak: hizkuntza eskubideak (euskaraz ikasi, lan egin edo bizitzeko eskubidea), eskubide demokratikoak (hitzaren ukazioa, indar polizialak, kamerak zein jazarpenak campusetan...)". Horri aurre egin eta "nahi eta behar dugun eredu unibertsitarioaren gaineko eztabaida gauzatzeko" kanpaina berria abiatu dute, "Hartu hitza!" lelopean, hain zuzen ere.
Abenduaren 20an manifestazioa
Bestalde, joan den ostiralean, Ikasle Abertzaleak erakundeak prentsaurrekoa eman zuen, Erandio era Leioako campusean, aurreko egunean burututako hauteskundeen emaitzen berri eman, eta batez ere, "nahiz Euskal Herriko unibertsitate desberdinek ikasleon hitza egun ez duten errespetatzen, hemendik aurrera ere lanean" jarraituko dutela adierazteko. Oraindik emaitza ofizialik ez badagoere, "ikasle eragile bozkatuena" izan dela iragarri zuen IAk. "Are gehiago, berriz ere gehiengo osoz irabazi du euskal ikasle mugimenduak", gaineratu zuen. Garaipenak gaipen, hauteskundeak "fartsatzat" jo zituen ikasle erakundeak. Alandabe. bozka horiek, "unibertsitateko instituzio antidemokratikoetan ikasleon hitza entzunarazteko" baliatuko dituztela aurreratu zute Ikasle Abertzaleek, "Bolognaren inposaketaren aurrean behar diren erantzunak emanez, bai UPVn , baita hurrengo abenduaren 19an UPNAn burutuko diren ikasle hauteskundeetan ere". Horren harira, abenduaren 20rako Euskal Herri mailako manifestazioa deitu dute Erandio eta Leioako campusean.
Euskal Herriak Bere Eskolak "eredu unibertsitario propioaren aldeko aldarrikapen herritarra artikulatzera" deitu ditu gaur ikasle, irakasle, unibertsitateko bestelako langile eta orohar herritar guztiak. Izan ere, egungo ereduari "inposatzailea" deritzo erakundeak; Bologna prozesutik hasi eta hizkuntza, hezkuntza eta demokrazia arloetan "ematen ari diren eskubideen urraketetan" amaituz. Horren ordez, euskal unibertsitatearen alde "hitza hartzera" deitu ditu herritarrak. "Hitza hartuko dugu unibertsitate euskaldun baten alde. Hitza hartuko dugu unibertsitate parekide baten alde. Hitza hartuko dugu Euskal Herriaren behar sozial, kultural zein politikoei erantzungo dien unibertsitate baten alde. Hitza hartuko dugu unibertsitate demokratiko baten alde. Hitza hartuko dugu hezkuntza eskubideak bermatuko dituen unibertsitate propio eta nazional baten alde", adierazi dute EHBEko kideek. Argazkian, atzoko kontzentrazio alaia / Gaztesarea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun