Teresa Toda, 18/98ko auzipetua: "Erantzuteko deia egiten diogu gizarte osoari"
Orain arte Alberto Frias, Txema Matanzas, Javier Salutregi, Mikel Korta, Iñaki O'Shea, Joxe Mari Olarra, Juan Mari Mendizabal, Natale Landa, Jose Luis Garcia Mijangos, Iker Casanova, Manu Intxauspe, Olatz Egiguren, Ruben Nieto, Joxean Etxeberria, Xabier Alegria, Juan Pablo Dieguez, Patxi Gundin, Pablo Gorostiaga, Elena Beloki, Xabier Balantzategi eta Jexux Mari Zalakain eta Mario Zubiaga EHUko irakasleak atzeman dituzte Espainiako Poliziak eta Guardia Zibilak, Berria.info agerkari digitalak zabaldutakoaren arabera. Beraz, Paul Asensio algortarra ez omen dute atzeman. Bitartean, atxiloketen aurkako erreakzioak ugaritzen doaz: atzemana izateko arriskuan ere badagoen Teresa Todak "Euskal Herriaren aurkako eraso hauei erantzuna" emateko eskatu du "Busturialdeko Hitza"-n. Argazkian, 18/98+ lantaldearen Kaiera ekimena EHUko Leioako campusean, Zalakain bertan zela, zutik eskuinetara / Gaztesarea.net.
Mikel Korta auzipetuak, berriz, "iragarritakoa" gertatzen ari dela esan du, eta gizarteari erantzuteko eskatu dio, "Euskal Herriak eta euskal herritarrak jasaten duten errepresioari aurre egiteko". Aurrerapausoak eman behar direla adierazi du, eta "Euskal Herriaren defentsan marko politiko demokratikoa" lortzeko lan egiteko deia egin du. Horrez gain, euren "militantzia berretsi" egiten dutela esan du. "Harro gaude daukagun militantziagatik eta jarraitu egingo dugu helburu berberen alde lan egiten, aske izateko eskubideak gauzatzeko". Jose Mari Olarrak artean atxilotua ez zegoela hitz egin du "Tolosaldeko eta Leitzaldeko Hitza"-rekin. "Ez dut epaiaren berri. Komunikabideetatik dakit atxiloketak egiten ari direla eta 46 lagunen kontra ari direla”, azaldu du Olarrak. “Espainiarengandik edozer gauza espero daiteke. Aspaldidanik dut uste hori. Nahi duena egiten du”. Olarrak gaineratu du “euskal herritar militante bezala aberria maite” duela eta badakiela “askatasuna nahi duenak sufritu egin beharko duela”. “Espainiako Estatuarekin ezin bada negoziatu, ostikoka atera beharko dugu hemendik”, esan du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun