Euskalerriko Eskautak Bizkaia (EEB) erakundea Areetako ludoteka kudeatuko duen Aisibizia Getxoko Aisialdiaren Taldeak elkartean sartu da. Eskubeltz Algortako eskaut taldeak zabaldu duenez, EEBk pasa den igandean egin zuen batzar nagusian hartu zen erabaki hori, algortarrek "berri ontzat" jo dutena. Orain arte, Areetako udal ludotekaren etorkizuna hiru talde kristauren eskuetan zegoen: Eskubeltzak berk, Itzubaltzeta / Romoko Ziztu Bizian eta Bilboko EDE Fundazioa. Orain EEB gehituko zaie. Ludotekan 5 eta 12 urte bitarteko 100 bat neska-mutilentzako tokia egongo da, horietatik 75 zozketa publikoaren bidez aukeratuko dituzte eta gainontzeko 25ak Udal Gizarte Zerbitzuek artatzen dituzten familien seme-alabentzat izango dira. Imanol Landa alkateak urtea amaitu baino lehen zabalduko dela agindu zuen. Bestalde, Ziztu Bizian Itzubaltzeta / Romoko taldeak gazte boluntarioak behar dituela jakinarazi du, haur eta gazteen begiraleak izateko. Argibide gehiago 665 710 639 telefonoan zein ziztu_bizian[abildua]yahoo.es posta elektronikoan eska daiteke. Argazkian, Eskubeltz eskaut taldeak pasa den urriaren 6an ospatutako ikasturte hasierako irudi bat / Eskubeltz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun