Udalerriko 40 kirol elkartek eta Getxoko Udalak GEHI “Gehitu Kirolera” hitzarmenaren izenpetze publikoan parte hartuko dute astelehen honetan, abenduak 3, Euskararen Nazioarteko Egunarekin bat. Getxoko IX. Euskal Kulturaren Jardunaldien barruan kokatutako ektialdia Algortako kultur aretoan, Villamonte kalean, izango da 20:30etik aurrera. Hitzarmenaren bitartez kirol elkarteek, aurretik aisiako elkarte askok egin zuten bezala, hainbat konpromiso hartuko dituzte euskararen erabilera euren jardueretan sustatzeko asmoz, eta Udalak konpromiso horiek betetzen laguntzeko hainbat zerbitzu eta laguntza eskainiko dizkie. Dagoeneko, martxoaren 28an, kirol jardueretan euskararen erabilerari aukerak zabaltzeko akordioa izenpetu zuten Getxoko Udal Euskara Zerbitzuak eta Bizarra Lepoan euskara elkarteak. Argazkian, orain lau urte 23 aisialdi taldek sinatu zuten Getxo Euskalduntzeko Hitzarmena (GEHI).
Bestalde, ordu bat lehenago, 19:30ean, Algortako kultur aretoan ere, “Goi mailako kirola=Profesionaltasuna?” izenburuko mahainguruan parte hartuko dute Nerea Onaindia Athleticeko jokalari eta kapitain ohiak, Izortz Zabala arraunlari ohiak, Aratz Gallastegi Getxo Arteako kirol zuzendariak eta Iratxe Ibarra pilotari eta bertsolariak. Moderatzailea Asier Txakartegi (Bizkaia Irratiko “Jokoan” saioko arduraduna) izango da. Azkenik, esan, Udal Euskaltegiko, Lauaxeta AEK Euskaltegiko eta Jose Antonio Agirre Euskaltegiko ikasleek goizean gosaria eta arratsaldean kafea izango dutela Algortako The Piper¨s taberna irladarrean. Aldez aurretik landu eta ikasitako abestiak trikitixaz lagunduta kantatu ere egingo dituzte. Hitzorduak goizeko 10etan eta arratsaldeko 5:30ean dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun