Guztira 31.546 pertsonek eman dute izena Euskal Herriko Unibertsitateko (EHU) Administrazio eta Zerbitzuen Langileen Enplegu Publikoaren Eskaintzaren aukeraketa prozesuan parte hartzeko. Izena emateko epea joan den azaroaren 23an bukatu zen. EHUk prentsa ohar bidez jakinarazi duenez, oposiziogile gehienek telematikaren bidez egin dute prozesuan aurkezteko eskaera (29.333 lagunek) eta oso gutxik egin dute ohiko bide administratiboetatik (2.213 pertsonek). Telematikoak ez diren eskaeren azken sailkapena egitear dagoela, administrari laguntzailearen (13.721) eta mendekoen (11.849) mailak dira eskaera gehien izan dituztenak; horien ondoren dago administrariaren maila, 2.519 eskaerarekin.Bestalde, gestioaren teknikarien taldeak 2.177 eskaera izan ditu bere maila ezberdinetan, eta erdi-teknikarienak 510. Azkenik, laguntzaile, artxibo, liburutegi eta museoen taldeak 770 eskaera izan ditu. Argazkian, Erandio eta Leioako campuserako sarrera nagusia.
EHUtik nabarmendu dute Euskal Autonomia Erkidegoan (EAE) bizi ez diren 343 lagunen eskaerak jaso dituztela, batez ere Kantabria (108), Nafarroa (82) eta Burgosetik (76). Halaber, Ipar Euskal Herritik hamar eskaera heldu zaizkiela azpimarratu dute. Eskaerak aurkezteko datari dagokionez, oposiziogile gehienek azken astera arte itxaroten dute, azaroaren 19tik 23ra, aste horretan 13.083 lagunek eman baitzuten izena (webgunearen bidez egindako eskaeren %44).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun