Leioako ikasleen oharra:
Gaur goizean kontzentrazioan bildu dira Leioako kanpuseko 150 irakasle eta ikasle baino gehiago 18/98 sumariopean burutu diren 46 atxiloketa berriak salatzeko. Euskal Herrian bizi den salbuespen egoera salatzeaz gain atxiloturiko euskal militanteen askatasuna galdegin dute eta herri gisa erantzuteko unean gaudela azpimarratu dute. Bereziki Gizarte eta Komunikazio Zientzien fakultateko irakasle diren Jexux Mari Zalakain eta Mario Zubiaga atxilotuak izan dituzte gogoan. Ondoren manifestazioan abiatu dira kanpusean zehar eta amaieran aurrera begira mobilizazio berriak iragartzeaz gain deialdi berezia egin dute datorren abenduaren 13an deitu den mobilizazio eta paro egunean parte hartzera.
"Utzi bakean Euskal Herria. Mario Zubiaga, J. M. Zalakain eta besteak askatu! Abenduak 13 mobilizazio eguna" lelopean, manifestazioa egin dute gaur goizean 150 bat ikasle eta irakasle Leioa eta Erandioko campusaren zehar. Protesta horren bidez, Gizarte eta Komunikazio Zientzien fakultateko irakasle diren Jexux Mari Zalakain eta Mario Zubiagaren zein 18/98 auzia dela eta kartzelaratu dituzten lagun guztien askatasuna aldarrikatu dute. Era berean, mobilizazioan zehar, "Euskal Herrian bizi den salbuespen egoera" salatu eta "atxiloturiko euskal militanteen askatasuna" galdegin dute. Azkenik, hilaren 13an izango diren lanuzteetan eta mobilizazioetan parte hartzera deitu dute. Argazkian, manifestazioa Arte Ederretako fakultatera hurbiltzen / Xirika.com.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun