Espainiako Auzitegi Nazionaleko Zigor Arloko hirugarren sekzioak atzo azken orduan hartutako erabakiaren arabera, 20.000na euro ordainduz gero aske geldituko dira Xabier Otero, Iñaki Zapiain (bi horientzako 60.000na euroko bermea eskatzen zuen fiskalak), Alberto Frias, Sabino Ormazabal, Fernando Olalde eta EHUko irakasle Mario Zubiaga. Ostiralaz geroztik atxilotutako gainontzeko 33 lagunak, ordea, espetxeratzea agindu zuen Angela Murillo epaileak. Horien artean dira Paul Asensio Algortako semea eta Barrikako auzokidea eta Erandio eta Leioako campuseko irakasle Jexux Mari Zalakain. Bestalde, epaiaren irakurketa publikoa abenduaren 10erako iragarri bazuten ere, Auzitegi Nazionaleko iturriek adierazi zuten atzo oso litekeena dela atzeratzea. Antza, egun horretarako "epaiaren idazketa nekez bukatuko dutela", zehaztu dute hainbat komunikabidek iturri ofizialak esandakoan oinarrituz. Argazkian, manifestazioa herenegun EHUko Leioa eta Erandioko campusean / Xirika.com.
Beste hainbat senitarteko bezala, Paul Asensiori joan zitzaizkion bisitan, larunbatean, Soto del Realgo (Madril) espetxera, aita eta anaia. Alabaina, ez zieten ikusteko aukerarik eman, senideek UKBERRI.NETi adierazitakoaren arabera. 19/98ko auziperatuak "euren aurpegien aurrean sakabanatzen" ari zirela ere salatu zuten hainbat familiarrek. Dena den, azken orduko aldaketarik ezean, Soto del Realen jarraitzen du Asensiok. Barrikako bere etxetik ateratakoen artean, poliziak aurrezki-libreta ikuskatzen aritu zirela ere salatu dute algortarraren senideek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun